GIBUTYAG ni Mayor Sara Duterte-Carpio nga daghang mga kaso sa coronavirus disease (Covid-19) nahitabo tungod sa pagtapok sa mga tawo.
Gitin-aw ni Duterte-Carpio sa dihang nahinabi sa 87.5 FM Davao City Disaster Radio Lunes sa hapon, Nobyembre 23, nga gani hagbay rang nagsulti ang mga doktor nga kung dunay mga tawo nga manggawas ug magtapok, motakod gyud ang kagaw.
Gani dugang pa sa mayor nga bisan sulod sa mga balay, namatikdan nga gawasnon kaayo ang kagaw nga makalatagaw tungod kay kadaghanan wa mosunod og minimum public health standards kay kompiyansa lang sab nga usa ra sila ka panimalay.
Tug-an niya nga daghan matud pay mga kaso nga dunay kalambigitan sa pagkaladlad sulod sa balay, nagtapok o nangaon kauban ang mga barkada.
Busa, kinahanglan nga tumanon sa kanunay ang sakto nga gilay-on sa matag usa (social distancing) bisan sa panimalay aron nga maluya og lukso ang kagaw ug di na makatakod sa laing mga tawo, ilabi na sa miyembro sa pamilya. (WGM)