DAVAO OCCIDENTAL -- Bisan miabot sa 113 ang kumpirmadong kaso sa nataptan og coronavirus disease (Covid-19) sa lalawigan apan, nagpabiling pinakaubos kini nga kaso sa lima ka mga probinsya sa Davao Region.
Sa uwahing talaan sa Provincial Health Office (PHO), nadugang ang duha ka kumpirmadong kaso sa Covid-19 human usa ka 31-anyos nga lalaki ang nahimong asymptomatic sa Barangay West Lamidan, Don Marcelino, dihang miadto kini sa Davao City.
Ang ikaduhang kaso mao ang 50 anyos nga babayeng asymptomatic sa Barangay Basiawan sa lungsod sa Sta. Maria, human miadto sa lungsod sa Sta. Cruz, Davao del Sur.
Pulos gidala sa Municipal Isolation Unit ang mga pasyente samtang gipahigayon ang contact tracing sa PHO.
Sa 113 ka ihap, lima na lang ang positibo lukop lalawigan.
Sa Davao Region, nag-una gihapon ang Davao City diin aduna'y 2,052 ka aktibong kaso.
Gisundan kini sa Davao del Norte nga aduna'y 225 ka aktibong kaso, 171 sa Davao del Sur, 109 sa Davao de Oro, ug 32 sa Davao Oriental.
Sa kinatibuk-an, anaa sa 2,594 ang aktibong kaso sa Covid-19 lukop sa rehiyon. (Orlando B. Dinoy)