SUPERBALITA CEBU

Gipusil, patay

NAKABSAN SA KINABUHI: Si Atty. Joey Luis Wee, 51, inilang abogado sa Sugbo, nakabsan sa kinabuhi sulod sa usa ka pribadong ospital human gipusil sa duha ka mga mamumuno dihang nikanaug sa iyang awto sa parking area sa Alchi Building sa J Panis St., Barangay Kasambagan, dakbayan sa Sugbo, ala 1:30 sa hapon Lunes, Nobiyembre 23, 2020. / AMPER CAMPAÑA [BUILDING], WLSLAWFIRM.COM [ATTY. WEE]

USA ka inilang abogado sa Dakbayan sa Sugbo ang gipusil-patay sa duha ka mga armadong lalake sa Alchi Building sa J. Panis St., Barangay Kasambagan, Dakbayan sa Sugbo, 1:30 sa hapon kagahapon, Nobiyemre 23.

Si Atty. Joey Luis Wee, 51, minyo ug dunay law office sa naasoy nga building, nagkupot og mga dagkong kaso.

Si Major Dindo Alaras, hepe sa Mabolo Police Station nga nahinabi sa Superbalita Cebu, nagkanayon nga si Wee mao pay pag-abot sa building ug nikanaog sa iyang sakyanan.

Nitikang sa hagdanan pasulod sa iyang law office apan nitunga ang duha ka tawo, nidagan sa sulod dayon nipusil kang Wee.

Dali nga nibiya ang killers sakay sa usa ka motorsiklo. Si Wee gidala sa tambalanan, apan, matod ni Alaras, nabugtoan kini sa iyang kinabuhi. Samtang, dunay kalabotan sa iyang pagka abogado ang motibo sa pagpusil-patay ni Wee.

Si Police Colonel Josefino Ligan, direktor sa Cebu City Police Office (CCPO), nagkanayon nga nakakuha sila og kasayuran gikan sa kabanay ni Wee nga naghawid kini og dagko nga mga kaso.

Matod ni Ligan niya nga walay illegal nga drugas nga iyang gilabanan sa korte apan mopalawom pa sila sa ilang imbestigasyon. Gipaabot pa niya ang igsuon ni Wee nga ilang mahinabi aron masayran kung aduna ba kini hulga nga nadawat sa wala pa ang pagpamusil.

Matod ni Ligan, ang ilang buhaton sa pagkakaron mao ang pag-back track sa mga kaso nga gihuptan ni Wee.

Sa pagkakaron, dili pa sila maka desisyon kung angayan ba nga moumol sila og special investigation task force sanglit dunay rekisitos alang niini. Mando ni Ligan sa iyang mga imbestigador nga palawman ang ilang imbestigasyon.

Si Wee maoy defense counsel sa mga kanhi opisyal sa Department of Public Works and Highways sa Central Visayas (DPWH) 7 kinsa nakombikto sa kasong korapsiyon bahin sa kontrobersiyal nga pagpamalit sa street lamps nga gibutang sa mga dakbayan Lapu-Lapu ug Mandaue isip dayandayan panahon sa 2007 Asean Summit.

Siya pud ang abogado sa katong agents sa National Bureau of Investigation (NBI) nga nirakrak sa van sa usa ka resort sa Lapu-Lapu niadtong 2005 kay abi nila nga sakay niini ang drug suspect nga ilang gigukod. Siya ang abogado sa mayor sa lungsod sa Rizal sa Palawan nga giakusar og rape niadtong 2010.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph