MGA representante sa mga grupo nga naa sa industriya sa real estate ang ninghimog lakang aron mausab ang Real Estate Service Act sa 2009 (Resa). Nisang-at sila og petition for declaratory relief sa miaging Martes didto sa Regional Trial Court sa Makati.
Gusto nila tangtangon ang kontra Pinoy nga mga probisyon sa maong balaod. Pananglitan, ang maong balaod nagpahamtang og mga educational requirements nga dili na gikinahanglan. Tungod niini, nimahal na hinuon ang gastuhan sa mga gusto mag-account executive sa mga real estate companies.
Pananglitan, ang mga aplikante sa Professional Regulation Commission (PRC) nga gusto mag-broker gikinahanglan nga dunay Bachelor of Science in real Estate Management (BSREM). Ang gusto mag-real estate broker kinahanglang mogasto og mga P300,000 sa upat ka tuig nga kurso?
Tungod niini, gamay ra ang mokuha sa maong kurso. Ang resulta kay gamay lang sab ang mag-real estate broker ug mag salesperson sa real estate. Kadto rang maka-afford. Buot ipasabot, kontra sa pagkakabos.
Nagkanayon si Leuterio nga anti-Pinoy ang RESA kay samtang gipig-utan ang mga Pinoy nagpatuyang lang ang mga ahensiya nga gipanag-iya sa mga langyaw.
Samot pa nga ang maong balaod anti-technology. Kay dugay na man kini, wa ma-consider sa mga nagmugna ang paglambo sa teknolohiya karon.
Tungod niining maong mga kinaiya sa RESA, nagka-anam kadako ang atong backlog sa housing nga 6.5 milyones nga mga balay.
Nagpasabot kini nga usa sa kada lima ka mga Filipino walay desente ug pormal nga balay, matod pa sa mga real estate agents nga nisang-at sa maong kaso.