PAHUWAY nga dayon, Kong. Raul del Mar, higala ug among kauban kaniadto sa buhat. Si Kongresista Del Mar ang kanhi manager sa pag-abli sa SunStar Daily sa wala pa siya nagpapili nga kongresista sa Cebu city north district samtang usa ko sa tulo ka news reporter. Ang among opisina kaniadto diha sa Borromeo Arcade, Ramos St. Mao ni ang pagsugod og computerized sa SunStar Daily diin si Atty. Cheking Seares ang among editor-in-chief.
Si kanhi Kongresista Raul maoy usa sa mga pulitiko dinhi sa tibuok Sugbo nga suod sa taga media. Suod tungod kay sayon duolon, di lisod pangitaon. Nasuod siya tungod kay dili siya masuko sawayon, bisan labtikan sa mga komentarista sa radyo ug maglilindog sa mga mantalaan. Di siya sama sa ubang pulitiko nga masuko ug makig-away kon sawayon.
Si Kongresista Del Mar makig-estorya sa mga mosaway kaniya ingon man sa iyang mga kaatbang sa pulitika. Gikan sa iyang pagsugod og lingkod nga kongresista hangtud nga napulihan siya sa iyang duha ka anak nga si Cutie ug Dr. Raoul matag human sa iyang tolo ka termino, siya gihapon hangtud sa iyang pagtaliwan niadtong Nov. 16 ang kongresista sa Cebu city north district. Dalaygon nga pulitiko!
Tungod sa kasuod ni Del Mar sa media sa Sugbo, iyang gipalapdan ang Sotto Law, nga naghatag proteksyon sa mga nagtrabaho lang sa print media. Sa RA 11459, nga gipangamahan ni Kongresista Del Mar ug napasar niadtong 2009, nalakip na ang mga magsisibya ug komentarista sa radyo, TV, ug ang mga nagtrabaho sa online ug wire news agency. Kining maong balaod naghatag og proteksyon sa mga nagtrabaho sa media nga mahimo nga di motug-an sa tinubdan sa ilang balita o storya gawas kon maghisgot kini og seguridad sa atong nasud.
Among pahasubo sa pamilya . Daghang salamat, Kong Raul, sa imong natabang sa pagpalambo ug paglig-on sa atong Freedom of the Press. Among iampo ang imong hilwas nga kaluwasan.
* * *
MOSAKA? Di kalikayan ang kahigwaos sa taga Department of Health (DOH) ingon man sa atong mga frontliner batok sa Covid-19, ang kaaway nga dili makita apan makamatay, nga mosaka og balik ang kaso sa Covid-19 tungod sa kasayon na sa paggawas ug biyahe sa katawhan labina na nga makabiyahe na ang traditional PUJ (TPUJ).
Matod ni Dr. Mary Jean Loreche, tigpamaba sa DOH-7, ang pagbalik sa mga TPUJ maghatag og dakong purohan nga mosamot ang takod sa Covid-19. Misugyot si Loreche nga kinahanglan regular ang pagtesting sa mga TPUJ driver sa Covid-19 ug strikto nga ipatuman ang minimum health protocol sama sa pagsul-ob sa mask ug face shield, manghugas sa kamot sa tubig ug sabon o manghaplas og alcohol.
Si LTFRB 7 Dir. Eduardo Montealto mihangyo sa mga lokal nga kagamhanan nga tabangan sila sa pagpatuman sa minimum health protocol tungod sa kakuwang sa ilang tawo. Kita mismo ang motuman aron di ta mahisama sa ubang nasud karon nga misaka og balik ang kaso sa Covid-19.