GRABE ang nasinating lunop sa kaulohan labi pa sa mga dapit sa Marikina City ug Cagayan Valley sa Luzon human giratsada sa bagyong Ulysses. Wala pa gani makabangon ang Bicol region human kuso-kusoha sa bagyong Rolly, lain na usab nga kalamidad ang mihapak sa nasud. Sus, tiaw ba nimo kanang tubig baha nga lampas pa sa ilang mga balay.
Natural calamities o mugna sa kina-iyahan. Asa man nato kini mabasol? Aw, samtang dili nato kini kapugngan, apan atong mabasol ang katawhan gumikan kay nagpabaya sa atong kalikupan. Upaw na ang atong kabukiran, barado ang mga sapa ug estero gumikan kay gitukuran og mga estraktura ug gilabayan og mga basura. Kon simbako languyon pito ka lawod, kon mahitabo kini dinhi sa ato, andam ba ta??
Human sa makalilisang nga bagyong Yolanda sa tuig 2013, naproybahan sa ikaduhang higayon ang kainutil sa National Disaster Risk Reduction and Management Council (NDRRMC) sa bag-o lang bagyong Rolly ug Ulysses nga nakamugna og grabeng lunop sa National Capital Region (NCR) ug Cagayan Valley.
Tingali makapangutana kita kon unsang pagka unsaa nga naingon man niini ang perdisyon? Kon basihan nato ang pagka-organisar ug kangilngig sa gamhanang buhatan nga nagsakop sa NDRRMC, morag naa na man ang tanang rekisito unsaon pagpangandam batok sa mga katalagman. Basin nasobrahan ra sab kita sa pagkabilib ning maong higanteng konsiho nga maayo kaayong paminawon ang mga teyoriya, pero bulay-og diay kaayo sa implementasyon.
Mao mangurog kitang maghuna-huna simbako moabot dinhi kanato ang susamang katalagman. Dinhi ra ba sa ato, gamay lang taligsik, maora nag-dagat ang uptown ug downtown areas. Preparado na ba ang atong disaster office sa syudad alang niini? O mao-mao ra sang matanga sa pangandam ang ilang ipasalig sa mga Sugboanon nga kasagaran mga “motherhood statements” nga kinopya ra usab sa gipangyawit sa mga opisyal sa kaulohan. Hinauton nato nga dili kini mga pasalig ug pagpalaum nga kutob ra sa mga pulong. Buhaton na nato karon ang pagpangandam. Karon na. Now na as in ug dili human sa laing lunop nga mahitabo simbako dinhi sa ato. (bobbygnalzaro@gmail.com)