NAG-TRENDING sa Twitter sa miaging semana ang #NasaanAngPangulo. Pwerteng sukoa ni Presidente Rodrigo Duterte kang Bise Presidente Leni Robredo tungod sa iyang pagtuo nga mao ni ang nagpasiugda. Apan ang Bise Presidente nanghimakak nga siya ang tinubdan.
Wa usab siya momando sa kapulisan ug kasundaluhan sa mga rescue operation, apan nakig-coordinate siya sa mga rescue personnel kay duna may nangayo og tabang sa iyang opisina. Iyang gitataw nga bisan ma kausa, wa siya maghisgot kabahin sa Presidente.
Wa usab si Robredo mogamit og mga helicopter sa pagsakay ug mismo si Defense Secretary Delfin Lorenzana nikompirmar niini.
Ang nakapait pa sa pagmahayag sa Presidente, duna ni pasumbingay kabahin kang Robredo, kinsang kampo nanalipod usab kabahin sa giingong lovelife.
Bisan tuod popular gihapon si Duterte ning duha ka tuig na lang nga nahabilin sa katungdanan, di angay mokompyansa ang iyang kampo kon gustong popularidad magpabilin.
Likayan ang samang mga hitabo tungod kay dehado si Duterte sa mao nga isyu kay di tinuod ang tanang mga estorya nga nangabot kaniya. Hinunoa, sa iyang gihimo, si Robredo ang nakapuntos og dako kaayo. Maorag nahimong santos makadiyot ang babayeng ikaduhang labing dakong opisyal sa nasod kay sila nasupalpal. Nagamit sa mga kaatbang ni Duterte ang isyu.
Kon kanunay kining mahitabo, sama ra sa ilang gihatagan og armas si Robredo samtang nagkaduol ang 2022 national elections. Kay sa matag isyu nga mogawas nga si Leni ang gidaugdaug, samtang mag-irog ang panahon, anam siyang magka popular, mogawas nga siya maayong lider, buotan, ligdong ug brayt.
Busa sa sunod, angay nga mag-amping ang mga sulsoltant ni Duterte aron di maunay sa tari. Ang nahitabo sa miaging semana di angay nga masubli pa. Lisod masupalpal, kredibilidad mawala.