IPATAKTAK sa serbisyo ang duha ka mga pulis nga nagpasiugda sa tigbakayan sa Sitio Caimito, Barangay Lataban, Lungsod sa Liloan hapon sa Nobiyembre 21, 2020.
Si Police Brigadier General Albert Ignatius Ferro, direktor sa Police Regional Office 7 nagpaabot sa report sa hepe sa Cebu Provincial Police Office (CPPO) aron masugdan ang imbestigasyon.
Wala lang una nganli ang duha ka pulis samtang wala pa hingpit nga pasakai og kaso apan giingong nadestino kini sa managlahing lugar sa Metro Cebu.
Matod ni Ferro nga usa ka dakong salaod ang nahimo sa duha ka pulis sanglit hugot nga gidili ang illegal nga sugal sama sa tigbakay.
Nasagmuyo ang heneral diin ilang gihingusgan ang kampanya batok illegal gambling sama sa tigbakay apan adunay duha ka pulis nga nagpabadlong nga mao pa ang nagpasiugda.
Naatol usab nga naa sa dakbayan sa Sugbo si PNP Chief Debold Sinas sa dihang gihimo ang tigbakay sa pagtuo sa duha ka pulis nga walay mag-monitor sa illegal nga kalihukan tungod sa ka-busy sa kaubanang mga pulis.
Gimandoan ni Ferro ang mga hepe sa duha ka pulis nga parelibohan sila sa katungdanan ug kuhaan sa ilang mga tsapa ug armas samtang magpadayon ang imbestigasyon.
Una nang nadakpan sa mga sakop Provincial Intelligence Unit (PIU) ang 11 ka mga sugarol nga naabtan nga nagtigbakay, apan ang duha ka pulis dali nga nakasibat.
Usa sa mga dinakpan ang nitug-an kinsa ang nagpadagan sa maong tigbakay. (AYB)