PANG-MASA ba nga presyo sa gupit ang inyong gipangita nga dunay pulid nga serbisyo? Ania na ang Juriz Barbershop nga anaa duol sa flyover Agdao Public Market, Davao City.
Ang tag-iya sa maong barbershop nga si Antonio "Jun" Emnace Jr., nagbutyag nga bunga kini sa iyang pangindahay sa kinabuhi sa Davao City.
Nagdako si Jun sa bukirong bahin sa Maragusan, Davao de Oro diin sa edad nga 18-anyos nahimo nang usa ka barbero.
Amahan sa lima ka mga anak, diin gidala sa dagayday sa kinabuhi sa siyudad sa Davao aron matukod ang Juriz Barbershop sa Agdao, siyam ka tuig na ang milabay.
Niining maong mga katuigan, misamot kadaghan ang iyang mga kustomer gumikan kay dekalidad kaayo ang resulta sa serbisyo.
"Sa wala pa ang pandemya, daghan gyud kaayo ang kustomer, pero nagmalig-on ko, hangtud nga bisan sa hinayhinay, naa man gihapon. Mobalik gyud ang kustomer kay ganahan man gyud sila sa resulta," saysay ni Jun nga gikan sa iyang napulo ka mga barbero, karon lima nalang.
Dugang niya, "lima nalang sila karon kay pandemic, nakasabot man pod sila, pero pag ma normal na, anytime sila kabalik, kay daghan man pod tag mga kustomer," saysay ni Jun kinsa 20-anyos na isip usa ka barbero.
Aron nga mas mapaambit ang abilidad, "ako ang mangunay sa paggupit labi na kung naa gyod tay mga kaila nga mo-request nga ako mo-gupit. Ginatudloan pod nako akong mga barbero para mobalik gyud sa ilaha ang ilang mga kustomer."
Alang sa dugang pangutana sa ilang serbisyo sila matawagan sa mga numerong 0907-140-4622 ug sa 0955-411-0726.