Dura: Naulaw ako sa nahitabo sa Davao

NAGSAGOL ang akong gibati dihang nabalitaan nako nga ibalik ang siyudad sa Davao sa general community quarantine (GCQ) niadtong miaging adlaw.

Nadugangan kini dihang nabalitaan nga miabot na dinhi niadtong Lunes ang 25-member medical contingent nga gipadala sa Armed Forces of the Philippines sa atong siyudad.

Ang contingent miabot alas 11 sa buntag didto sa karaang Davao International Airport nga gilangkoban sa lima ka mga teams nga ang matag usa dunay usa ka medical doctor, duha ka mga nurses ug duha ka medical corpsmen.

Una, nalipay ako tungod kay gawas sa mga personahe, nagdala usab sila og mga mahinungdanon nga medical supplies. Hilabihan ang akong kalipay tungod kay makatabang sila sa atong mga health care workers sa Southern Philippine Medical Center (SPMC) sa pag-atiman sa naghuot nga mga pasyente sa Covid-19.

Nalipay ako tungod kay ang AFP wala gibati og kakapoy sa pagtrabaho sukad nagsugod ang pandemya sa nasud. Sila ang nakakontrola sa taas nga kaso sa Covid-19 sa Bacolod, Cebu, ug Batangas.

Busa, dako kaayo ang akong pagsalig nga maestabilisa ang pagkuyanap sa Covid-19 pinaagi sa pagpatuman sa maayong estratehiya dinhi sa atong siyudad.

Apan luyo sa kalipay, naay nagpahipi nga kaulaw ang akong gibati tungod kay wa nato nahimo sa kaugalingon nga paningkamot nga masumpo ang makamatay nga kagaw. Naulaw ako tungod kay, pipila kanato nga mga Dabawenyo, grabeng nakasaway sa mga Cebuano nga gahi sila og ulo dihang gibalik sila sa GCQ.

Tungod kay ubos kaayo ang kaso sa Covid-19, gihimo pang modelo ni Presidential Spokesperson Harry Roque ang Davao City nga dunay pinakamaayong paagi sa pagpugong sa Covid-19. Sa akong pagpaniid sukad pa niadtong gipatuman ang lockdown sa tibuok siyudad, kulang kaayo ang suporta sa pipila ka mga opisyales sa barangay.

Gani, imbes nga sila ang mopatuman sa health protocols, sila pa hinuon ang magpasiugda sa ilang mga constituents sama sa pag-inom (bisan liquor ban), sabong, walay social distancing, ug uban pa.

Ambot nganong bugnaw pa sa simod sa itoy ang suporta sa pipila ka mga kapitan sa atong pinanggang Mayor Sara Duterte-Carpio?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph