SIKOP ang usa ka ex-police atol sa gikasa nga buy-bust operation sa Sta. Ana Police Station ala una sa hapon, Nobyembre 23, 2020 didto sa Camella Communal, Buhangin, Davao City.
Ang dinakpan giila sa Sta. Ana Police Station nga si alyas Badih Sajid, 49-anyos, minyo, ex-police, ug residente sa Barangay Communal.
Sumala ni Police Major Benkalin Baluan, hepe sa Sta. Ana police, nga napulo ka tuig na nga nagserbisyo pagka pulis ang suspek diin ulahi kining nadestino sa Mobile Force sa Davao Oriental nga dunay ranggo nga Police Officer 3 kinsa nag-absence without leave (Awol).
Ang dinakpan gikonsiderang high-value individual (HVI) sanglit ang mga parokyano niini nakabalo nga kanhi siya pulis.
Anaa sa mokabat kapin kun kulang P35,000 ang kantidad sa gituohang shabu nga nakuha sa posisyon sa suspetsado.
Nakuha sab sa posisyon niini ang cellphone, marked money ug mga drug paraphernalia.
Giandam na ang mga ebedensiya ug mga papeles alang sa summary inquest procedure sa suspek didto sa korte.