Mga duwa karon
3:45 pm- Meralco batok Ginebra
6:30 pm- Phoenix batok Talk N’ Text
Mosuway pagsulod sa finals ang Brgy. Ginebra Gin Kings ug Phoenix Super LPG Fuel Masters batok sa ilang tagsatagsa ka kontra sa Game 4 sa best-of-five semi-finals series sa 2019-20 Philippine Basketball Association (PBA) Philippine Cup sugod karong hapon sa AUF Gym sa Angeles City, Pampanga.
Ang Gin Kings makigharong sa Meralco Bolts sa premirong duwa sugod sa alas 3:45 sa hapon samtang ang Fuel Masters makigsangka sa Talk N’ Text (TNT) Tropang Giga sa main game.
Parehong nasayod ang Gin Kings ug Fuel Masters nga ipagawas sa ilang tagsatagsa ka kontra ang tanan niining makaya ug mao kini ang ilang gipangandaman og maayo.
“It’s going to be really hard to close them out,” matod ni Ginebra coach Tim Cone nga napatik sa www.pba.ph. “They got a great coach over there who’s also been through these kinds of wars and they got a young, hungry core that’s listening to him.”
Nagkanayon si Meralco coach Norman Black nga dili sayon ang pagbuntog sa Gin Kings hinungdan nga kinahanglan nilang makapakita og maayong duwa sa tanang mga departamaneto.
“Simply put, we’re in a must-win situation,” asoy ni Black. “We must play better on both ends of the court and we must bring a high energy level.”
Sa ilang series, lisod ang pagtagna sa posibleng mahitabo basi sa resulta sa nag-unang tulo ka mga duwa.
Sa Game 1, gipanglampornas sa Gin Kings ang Bolts, 96-79, apan ningbawos ang Bolts pagmakmak sa Gin Kings sa Game 2, 95-77.
Sa Game 3, ang Gin Kings ningsubay og mga pagpanghudlat una nila napukan ang Bolts, 91-84, nga naghatag kanila og 2-1 nga bintaha sa series.
Sa laing bahin, nagkanayon si Tropang Giga coach Bong Ravena nga mohimo sila og dakong adjustments sa ilang tinguha nga makapugos og deciding Game 5 batok sa Fuel Masters.
“Alam na alam na nila mga usual na ginagawa namin. Nasasangga na nila,” asoy ni Ravena.
“Kailangan naming ibahin suntok, kasi kami nasusuntok nila, salag lang kami ng salag.”
Ang nag-unang tulo ka mga kombati tali sa Fuel Masters ug Tropang Giga pulos kulbahinam ug gilauman nga mao gihapon kini ang mahitabo ning higayuna. / ESL