Para nako, usa ka maayong desisyon ang nakab-ot ni Cebu City Mayor Edgardo Labella, nga way night market kay misaka ang kaso sa Covid-19 ug wa magpasabot nga way pagbati ang mayor sa vendors.
Di ba gihugtan pagbalik ang border sa siyudad gikan sa probinsya sa Sugbo. Kay miabot sa 59 ka kaso sa usa ka adlaw.
Tungod sa gihimo ni Labella, mibalik pag-ubos ang kaso sa Covid-19. Mitala sa miaging adlaw og duha nalang ka kaso.
Kon imong sabton, gibalanse lang sa mayor ang ekonomiya ug ang health.
NORTH DISTRICT
Busy kaayo si House Speaker Lord Allan Velasco sa Kongreso ug siya sab karon ang caretaker sa Cebu City north district.
Kay wa man gayud special election tungod sa apeke sa budget ug panahon, mas maayo magbutang nalang og acting caretaker si Velasco.
Sa ilang pagsigi og estorya ni Cebu City Mayor Labella, mahimong si Konsehal Atty Raymond Garcia nga ilang kaalyado sa pulitika ang ibutang o ni kinsa man kanila.
Sama sa kahimtang sa IATF sa ka-busy ni General Mel Feliciano, gibutang si Councilor Joel Garganera nga deputy implementor nga nakig-teamwork ni Labella.
NAHIMONG MAYOR
Bintaha kon magikan sa media ang mahimong pulitiko sa ama ni Tudela Camotes Cebu Mayor Jojo Solante kay dali makakita sa panginahanglan sa katawhan.
Si Solante kanhi manager ug commentator sa dyMF Bombo Radio Cebu maoy duolan sa mga reklamo sa katawhan.
Nabasahan ni Solante ang akong gisuwat pagpalit nila og commuter van ug gihimong 24/7 Covid-19 ambulance sa ilang lungsod.
Nag-private message si Solante ug nipahibawo nga ang Tudela usa ka 5th class municipality.
Matod ni Solante, ang mga pasyente nga taga Tudela, sa Ricardo Memorial District Hospital sa San Francisco nga i-refer sa ospital sa dakbayan sa Sugbo ihatud sa ilang ambulansya.
Duha na karon ang ilang ambulansya sa lungsod, ang hinatag gikan sa Philippine Charity Sweepstakes Office (PCSO) ug ang ikaduha mao ang bag-o nilang napalit sa lokal nga kagamhanan. (Email: efrenlonzon71@gmail.com ug text sa 09235562777)