SUPERBALITA CEBU

Diputado: Gubot pa sa lukot

Cuentas Claras

Kasagaran sa mga estudyante maibog magtan-aw sa mga parehas nila nga estudyante nga nagtungha sa mga ilado nga mga eskuylahan, labi na gyod kadtong mga eskuylahan nga gigastohan sa gobierno.

Libre ang tuition ug uban pa nga bayrunon ug tungod sa pagkailado niini, dali ra makasulod sa trabaho inig ka-graduate na.

Mao kini hinungdan nga mao kini sagad pangandoy sa mga estudyante.

Apan dili sayon ang pagsulod sa maong mga eskuylahan.

Kasagaran, dunay entrance exam. Kon dili kapasar, sorry na lang. Mao kini hinungdan nga igo na lang sila sa pagpangandoy.

Ang problema lang kay kadtong suwerte nga naka-eskuyla sa maong mga eskuylahan moagi gyod og dakong kausaban.

Mag-apil-apil na sa mga rally-rally, magdaladala og plackards, demonstrations ug uban pa nga mga tapok-tapok. Siyaok lang ang tingog kon makagunit og microphone dayon lambos sa kagamhanan.

Bisan unsa na lang ang ipangyawyaw.

Imbes magtuon o moeskuyla, adto na hinuon magyampungad sa mga kalihokan sa kadalanan. Dali ra makakita og mga sayop sa kagamhanan ug sama sa mga eksperto na sa pang-gobierno nga mohingalan sa mga angay buhaton sa mga opisyal.

Ang nakaparat sa ilang gibuhat kay ang ilang giatake mao ang gagasto sa ilang pag-eskuyla. Sa mga kinaraan pa, gihungitan na, gikaon pa gyod og apil ang kamot sa nagpakaon.

Sama sa nahikalimot sila nga nahimo sila nga estudyante tungod kay gigastohan sila sa gobierno.

Unya ang uban kanila dili mahuman og eskuyla kay tua na sa bukid, apil na sa New People’s Army (NPA).

Kon akoy pangutan-on, kon magsigi lang og atake o mangita lang ug sayop ning mga klaseha sa estudyante, mangita og kagubot, magdagan-dagan nga maghubo, magrally-rally imbes moeskuyla, maayo pa nga undangon sa kagamahanan ang paghatag og sustento sa maong mga eskuylahan.

Nagtuo ko nga kanang gitawag og Bayanihan to Heal as One Act nagpasabot na nga magtambayayong aron mabuntog ang COVID sa hiniusa nga paagi.

Dili man diay. Ngano man?

Kay akong nakita nga nag-iyahanay na man hinuon. Dunay gipagawas nga patakaran sa kwarantinas ang national government, duna pod patakaran gipagawas ang mga local government units nga lahi ra sa patakaran sa national government.

Pananglit, giingon sa national government nga libre sa 14-ka adlaw nga kwarantinas ang mga Authorized Persons Outside Residence (Apor).

Apan dunay mga LGU nga wala motuo niini og padayon nila nga gipatuman ang pag-priso sa mga Apor nga mobisita sa ilang lugar.

Ang ubang lugar nag-abli na sa ilang lugar para sa mga turista pero ang uban, sirado pa gihapon. O kon abri man gani, lisudlisoron pod ang mga mobisita pinaagi sa paghatag og daghan kaayo nga mga angay sundon ug buhaton.

Naunsa na man kini?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!