SUPERBALITA CEBU

Editoryal: Good vibes sa ika-38

Ang SunStar Cebu misaulog karon, Miyerkules, Nobiyembre 25, sa iyang ika-38 nga kasumaran uban sa tema nga “Good vibes at 38.” Kini nagsamin sa iyang pagtan-aw sa positibong aspeto ug pagpangita og opurtunidad taliwala sa daghang hagit ug kalisdanan ngsa mihapak sa industriya sa pamahayag sa kalibotan.

Usa kini sa mithi sa SunStar Cebu kon nganong nagpabiling lig-on ug numero uno nga mantalaan uban sa pro-active nga tagdumala. Abante ang panglantaw aron makatimon pag-ayo sa sakayan ug dili matikyaob sa mga balod sa paghamok sa dautang panahon.

INTERNET

Sama sa paspas nga kausaban sa natad sa komunikasyon mugna sa internet, mitumaw ang social media. Namugna ang daghang platforms sa internet nga nagtanyag og libre nga pagmantala. Daghang nabag-ohan ug namalhin sa internet sa ilang tinubdan sa kasayoran.

Mas grabe, ang advertisers miuban sa uso nga libre o barato kaayo nga pagbayad sa advertisement sa internet. Unsay epekto? Daghang mantalaan o kompaniya sa komunikasyon sa tibuok kalibotan ang nanira tungod sa grabeng alkanse sa ilang operasyon.

Uban sa grasya ni Sr. Sto. Niño, ang SunStar Cebu nakaharong. Dali nakahimo og mga gikinahanglan nga makalahutay human mikunhod pag-ayo ang kita. Ang SunStar usa sa unang mantalaan nga misagop sa computerization program ug digital publication.

Apan subo nga pamalandungon nga kaluha niini ang pagtaktak sa iyang kawani labi na kadtong wala modugang sa iyang kahibalo ug kahanas gamit sa bag-ong mga ekipo o teknolohiya sa pagmantala.

Ug kini nga kahimtang dugay nang nakita sa nagkaplag ug lig-ong haligi sa SunStar nga si Atty. Jesus Garcia Jr. hinungdan nga iyang gitukod ang kanhi SunStar Network Exchange (Sunnex), karon gihiusa na sa “one newsroom” nga gitawag nga SunStar Integrated Newsroom alang sa tanang produkto sa SunStar Publishing Inc. nga naglakip sa Superbalita Cebu.

COVID-19

Nakakurat sa tanan mao ang pagtumaw sa pandemiya sa coronavirus disease 2019 (Covid-19) sa sayong bahin sa 2020 sa Sugbo human sa pagbuto niini dito sa Wuhan, China ug daling mikuyanap sa tibuok kalibotan. Minilyon ang namatay sa krisis sa panglawas sa naasoy nga sakit hangtod ning panahona.

Ang kalig-on sa SunStar Cebu nahagit na usab ning panahon sa pandemiya. Dugang pagdugo sa panudlanan human lisod na ang pagpamaligya sa mantalaan sa kadalanan tungod sa hugot nga pagpatuman sa kuwarentina ug lockdowns. Hinayhinay na unta namalik ang advertisers sa tradisyonal nga matalaan apan naapektohan sa problema sa Covid-19.

Apan human naplastar na daan ang panghunahuna sa mga mamahayag sa SunStar ang “web first,” dili na lisod ang pagmantala nga digital. Samtang, napamatud-an usab nga wala mabugto ug nagpadayon usab ang tradisyonal nga mantalaan taliwala sa gamay na lang nga kawani human sa dinaghang retrenchment gipatuman.

Bisan sa higpit na lockdown, ang mga kawani nakahimo gihapon sa tradisyonal pinaagi sa work from home (WFH). Sa pagkakaron, hinayhinay namalik ang mga kawani sa buhatan apan, ang dakong bahin pwersa naa gihapon sa WFH. Higpit usab nagsunod nga health protocol nga gilatid sa kagamhanan.

UBANG HAGIT

Sa iyang pagbiyahe ngadto sa ika-38 nga tuig, daghan pang uban hagit nga nasugatan. Ang paglatos sa mga politiko ug mga kalamidad sama sa bagyo ug linog apan wala maputol ang pag-alagad sa SunStar sa paghatod og kasayoran.

Ang SunStar nakadawat na og daghang awards gikan sa lokal, nasyonal ug internasyonal nga award-giving bodies nga nagsilyo sa iyang maayong pagkasuwat sa Iningles nga pinulongan uban iyang patas nga pamahayag.

Nagtuo ang tagdumala sa digital sa pagmantala apan usab hingpit mawala ang tradisyonal nga mantalaan tungod sa bentaha niini sa paghipos sa kasayoran o shelf-life. Unsay napatik, dili na mausab. Apan sa digital pwede usbon dihadiha dayon.

Ang kalamposan sa SunStar dili tungod sa mga tawo o mamahayag nga luyo niini ug mga tag-iya sa kompaniya apan, tungod sa kaninyo nga bumabasa ug advertisers lakip sa news dealers, newsboys ug newsgirls. Labaw sa tanan, ang grasya gikan sa Kahitas-an.

Hinaut nga magpadayon ang kalig-on sa SunStar. Good vibes sa iyang ika-38 nga kasumaran.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!