Sa padayon nga pagpahigayon og klase kon pagtuon sa mga tinun-an sa mga balay gumikan sa online classes o pinaagi sa module, hugtanon nga gidili ang pag-operate sa videoke, karaoke o bisan unsa nga matang sa pagsaba-saba sa lungsod sa Dalaguete, Sugbo.
Kini subay sa giluwatan nga Executive Order No. 63 S.2020 ni Dalaguete Mayor Jeffrey Belciña.
Natala sa EO nga gidili ang pag-videoke, karaoke session o bisan unsang paagi sa pagsaba-saba sa pribado ug publikong lugar sa lungsod gikan sa Lunes hangtod na sa Biyernes gikan sa 7:00 sa buntag hangtod sa 5:00 sa hapon.
Gitugot na ang pag videoke matag Sabado ug Dominggo apan kinahanglan nga dili molapas sa 10:00 sa gabii tungod sa pagpatuman sa curfew sa 10:00 sa gabii ngadto na sa 5:00 sa buntag.
Aron masiguro nga matuman ang maong mando gitahasan ang mga barangay officials ug ang kapulisan sa pagsusi sa ilang mga lugar. Samtang sa mga establisimento nga mosupak sa kamandoan, mipasidaan si Mayor Belciña nga bakwion ang giluwatang Mayor’s ug Business Permit aron nga dili na kini maka-operate. / ANV