Nagkaguliyang ang usa ka pamilya sa Sitio San Roquehanon, Barangay Mambaling, Dakbayan sa Sugbo niadtong gabii sa Nobiyembre 23, 2020.
Matod ni Ramil Ayuman, hepe sa City Disaster Risk Reduction Management Office (CDRRMO), nga ang iyang mga sakop sa Quick Response Team (QRT) nakadawat og tawag. Ang caller nangayo og tabang sa dihang usa ka sawa napalgan nga nagkumbitay sa kisame sa balay ni Marilyn Aballe.
Gibana-bana nga adunay gitas-on nga tulo ka metros ang sawa kansang gidak-on susama og regular nga bukton sa tawo.
Milanat sa kapin duha ka oras nga pagkuha sa bitin tungod gilikayan nga makapaak kay gituohan gigutom human nga naaktuhan nga gitukob niini ang binuhing iring sa tagbalay.
Ang bitin gitugyan na ngadto sa hingtungdang ahensiya aron sa paghipos niini. / BBT