Usa ka Hapon ang nagbuy-od sa dalan Juana Osmeña sa Barangay Kamputhaw, Dakbayan sa Sugbo niadtong Dominggo, Nobiyembre 22.

Ang Abellana Police Station nakadawat og tawag may labot sa usa ka lalake nga nagligdas daplin sa kalsada sa maong dapit, sa dihang gidala sa Cebu City Medical Center gideklarar nga dead-on-arrival (DOA) apan way nakitang samad diha sa lawas niini.

Gibutyag ni Police Colonel Josefino Ligan, hepe sa Cebu City Police Office (CCPO) adunay lalake nagpailang drayber sa namatay ang nipahibawo nga usa ka Hapon ang maong lalake nga ginganlan og Kori “Mr. Shans” Shunsuke, 32, taga-Hokkaido, Japan.

Giingong adunay negosyo nga English ug Japanese school si Shunsuke dinhi sa Sugbo.

Sigun sa pamahayag sa drayber niini, nagpahatod ang iyang amo sa dapit diin siya napalgan kay mangabang og babaye, apan wala na siya makabalik aron pag-pick up kaniya tungod kay wala siya makadawat og tawag nga magpakuha.

Gimandoan ni Ligan ang hepe sa Abellana Police Station nga makig-alayon sa drayber alang sa dugang nga mga pangutana may labot ni Shunsuke.

Dili pa makasiguro si Ligan kung aduna bay foul play ang kamatayon ni Shunsuke samtang wala pay resulta sa autopsy sa PNP Crime laboratory.

Nakig-alayon na ang CCPO sa Japanese Embassy labot sa maong insidente. / AYB, GPL