Duna nay ganti ang sakripisyo sa mga pulis nga nataptan sa coronavirus disease ( Covid-19) tungod sa ilang pagka frontliner sukad nagsugod ang pandemic.
Matag usa sa mga pulis nga gi-Covid, dunay P50,000 nga hinabang nga madawat gikan sa ilang regional offices.
Matag pulis usab nga samaron ug naospital tungod sa ilang pagbuhat sa ilang tahas, hatagan matag usa og P100,000 isip pinansyal nga hinabang gihapon. Mao kini ang tipik sa kamandoan nga giluwatan ni PNP Chief Debold Sinas nga gipagawas sa Camp Crame sa Nobiyembre 24, 2020.
Sa Central Visayas, 600 kapin ka mga pulis, labing minos 110 mga sakop sa Cebu City Police Office (CCPO) ang makapahimos niini.
Ang CCPO maoy dunay labing daghang mga pulis nga nataptan sa Covid-19, labina dihang ang Cebu City maoy epicenter sa nasod sa coronavirus infections. Wa na hinuoy mga pulis sa Cebu City nga dunay Covid-19 sukad sa Oktubre.
“All PNP frontliners who tested positive of Covid-19 shall be given financial assistance amounting to P50, 000,” matod sa memo nga gipirmahan ni Police Major General Emmanuel Licup alang sa tanang mga regional offices sa nasod ubos sa mando ni Sinas.
Duha sa upat ka mga pulis sa Sugbo nga nangamatay sa Covid-19 mga sakop sa CCPO.
Si Police Regional Office 7 Director Brig. General Albert Ignatius Ferro, sa iyang bahin, nihulagway niini nga makapataas sa morale sa kapulisan.
Makataas sa morale sa kapulisan ang paghatag og P50,000 sa mga personnel sa tibuok nasud nga nagpositibo sa Covid-2019.
Matod ni Ferro, adunay 610 ka pulis sa Central Visayas ang natakboyan sa Covid-19, upat niini ang nakalas sa maong virus.
“That is a very big help. At least it is a morale booster. At the same time, it will help some of the expenses nga na-incur nila to take some medicines,” matod ni Ferro sa Superbalita Cebu.
Wa na masurpresa si Ferro sa maong pag-ayuda sa mga pulis nga nasakit sa Covid tungod kay mao na kini ang batasan ni Sinas kaniadto pa.
Matod niya nga sukad si Sinas ang iyang nahimong boss didto pa sa National Capital Region Police Office (NCRPO), matinabangon na kini sa mga pulis.
Gimandoan usab ang tanang regional director sa pagduaw sa ilang tanang mga sakop nga nangaospital kay naangol sa ilang paghimo sa tahas, gawas sa P100,000 nga financial assistance.
Ang mga pamilya sa mga pulis usab nga nangamatay sa pag-duty pahatagan og bandila sa nasod ug korona sa patay agig pag-ila sa kabayanihan.
“All RDs are required to visit PNP personnel who have been injured and hospitalized in line of duty and should provide them with financial assistance not less than P100, 000,” dugang sa samang memo.
BONUS PUD
Sa samang higayon, gibutyag ni Sinas nga gipagawas na ang P7.98 billion nga bonus ug cash gifts. Matod ni Sinas nga nasulod na sa matag account sa mga police official ug enlisted personnel ang ilang cash gift ug yearend bonuses.
“The PNP through the Finance Service has rolled out P7,988,196,040.32 to pay for the 2020 yearend bonuses and cash gifts of 215,571 PNP personnel who are qualified to receive this mandated financial windfall that is now credited to their individual ATM payroll account with Land Bank of the Philippines,” matod ni Sinas sa usa ka pamahayag sa Lunes, Nobiyembre 23, 2020.
Matod niya nga ang bonuses alang sa mga nag atubang og administratibang mga kaso ug gipangsuspenso gipadaplin una. / REV, SunStar Philippines