SUPERBALITA DAVAO

Delos Reyes: Duterte-Duterte sa 2022? (Una sa duha ka gula)

Yanong Pagsabot

ATO una nga biyaan ang paghisgot sa Covid-19 kay bun-og na ang dulonggan sa katawhan sa maong isyu, hilabihan na sab ang kahasul nga gidala ining sakita sa tibuok kalibutan.

Makahupay sa atong kahasul ang paghisgot sa politika kay nagsugod na pag tak-ang ang pipila aron ihanyag ang bag-ong putahe alang sa 2022 nga eleksyon.

Gipaningkamutan sa mga oposisyon sa milabay nga mga tuig nga masumpo ang Anti-Dynasty sa atong nasud apan wa misaler kay pangalan sa amahan ug anak naman hinuon ang mitumaw nga magpares alang sa Presidency ug Vice Presidential position, si Mayor Sara Duterte for President ug si President Rodrigo Duterte, mokanaug pagka Vice President.

Uyon ka ba ini? Migawas sa mga ngabil ni kanhi Presidential Spokesperson Atty. Salvador Panelo ang pahayag nga inigkahuman sa termino ni President Digong modagan siya nga Bise Presidente ni Mayor Sara nga iyang anak.

Sa balaud sa atong nasud o Constitutional Law, wala may nasulat nga gidili kini alang sa mga buot magpapili sa bisan unsa nga posisyon sa elective office sa nasud. Sa atong pagsabot pwede ra!

Unsay posible nga isyu ang himoon sa mga anti-Duterte kon ugaling matinuod ang Duterte-Duterte tandem sa 2022? Dili isyu sa dynasty, apan posible nga mas taas pa. Isyu sa pag-monopoliya sa gahum -- ang isyu nga ilabay ngadto kanila apan sa ato nang gikasulti -- walay balaud nga pwede mobabag alang kanila pagkab-ot kung ugaling maoy ilang handum.

Kung ang popularidad ni President Digong ang basihan, taas ang pagsalig sa katawhan kaniya ug mohatud kini sa iyang kadaugan ug sa mga kandidato sa administrasyon nga magpasakop kanila sa umaabot ng eleksyon.

Dili sab layo nga maapil sa linya ang laing Dabawenyo nga kasamtangan ang Cabinet Secretary, Atty. Karlo Alexei Bendigo Nograles.

Monopoliya ba kon pulos Duterte ang magkupot sa taas nga pwesto sa atong gobyerno?

Sa mata sa mga kaatbang sa politika posible nga maoy ilang panglantaw apan wala tay mahimo kon sila ang pilion sa katawhan inig abot sa eleksiyon tungod katawhan man ang magbuot pinaagi sa balota.

Dautan ba ang dangatan sa atong nasud kon ugaling mahitabo ang Duterte-Duterte victory?

Sa atong pagsabot, ang distinasyon sa atong nasud naga depende ra gyod kon unsang matang sa mga pangulo ang atong pilion nga palingkuron sa gahum.

Dili man buta ang tanang katawhan sa Mindanao nga wala makakita unsa kadaghan ang proyekto sa gobyerno nga gihatag sa Mindanao sa nakalabay nga mga administrasyon. Atong nasinatian nga salin o tipik nalang sa pundo sa gobyerno ang gibalik sa katawhan pinaagi sa serbisyo ug mga project kay priority sa ilang dughan ang Luzon.

Ubos sa Build... build... build program ni President Digong, dungan nga gipalambo ang nasud. Naka ingon ang taga Mindanao nga gipalabi ni Presidente Digong ang Mindanao kay daghang project ang gihatud sa mga probinsya. Sa akong pagsabot, nakuratan lang ta kay wala nato nasinatian sa nakalabay nga administrasyon.

Alang sa Duterte administration, si Mayor Sara ang ginatan-aw nga pinaka-sinaligan nga modala sa kadaugan aron ipadayon ang kalambuan nga gisugdan sa iyang amahan. Kon kinsa ang ibutang sa partido sa PDP Laban nga ka tandem ni Mayor Sara partido ang magbuot ug kon kombinsido ang partido nga si President Digong ang bise, wala pud tay mahimo. (Ipadayon sa sunod gula)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph