GIKUSO-KUSO sa buhawi ug giulan og ice ang upat ka barangay sa Datu Saudi Ampatuan alas 2 sa hapon, Martes, Nobyembre 24, 2020.
Matud ni Municipal Administrator Musib Tan nga gibuhawi ug giulan og ice ang mga Barangay Dapiawan, Kitango, Madia ug Ilian.
Gikanayon ni Tan nga sa wala pa moigo ang buhawi sa maong mga lugar, mibundak una ang makusog nga ulan ug hangin, ug taud-taod, dunay nangahulog nga ice gikan sa kawanangan.
Wa madugay, nasaksihan sa mga molupyo ang nagtuyok ug naghaguros nga hangin.
Nanagan ang mga molupyo paingon sa luwas nga dapit samtang ang uban nanago sab sulod sa ilang mga balay.
Nangatumba ang mga punoan sa kahoy ug gilangkat pa sa makusog nga hangin ang mga atop sa kabalayan.
Suwerte nga walay nadisgrasya o naangol nga mga molupyo sa maong hitabo.
Nagpaabot dayon og hinabang ang local government unit sa Datu Saudi Ampatuan sa mga biktima sa kalamidad. (Edgar E. Fuerzas)