Bolts mikuryente sa Kings; semis series tabla

Gipakuryentihan sa Meralco Bolts ang Brgy. Ginebra Gin Kings, 84-80, kagahapon sa Game 4 aron pagpugos og deciding game sa 2019-20 Philippine Basketball Association (PBA) Philippine Cup bubble sa AUF Gym sa Angeles City, Pampanga.

Si Chris Newsome nakamugna og upat ka krusyal nga mga puntos sa hinapos nga bahin unya nakapasa sa bola ngadto kang reynel Hugnatan nga nakahatag sa Bolts og 81-80 nga labaw sa nahabiling 15 segundos.

Sa return play, ang pambatong pointguard sa Gin Kings nga si Stanley Pringle mi-layup apan napalakan siya n Raymond Almazan.

Human niini, nakamugna na sab og assist si Newsome ngadto kang Cliff Hodge, kinsa maoy nimugna sa katapusang puntos sa duwa.

“We just wanted to get the first good available shot,” matod ni Meralco coach Norman Black kabahin sa ilang duwa sa hinapos nga bahin nga napatik sa www.pba.ph.

“The play was between Reynel and Chris Newsome... They executed it well, but of course, you still gotta make the shot. That’s a huge shot for Reynel.”

Gipangulohan ni Hugnatan ang kadaugan pinaagi sa iyang 19 puntos, nidugang og 16 puntos matag usa sila si Hodge ug Newsome samtang niamot og 11 puntos si Almazan.

Pagsugod pa lang sa duwa, ang Bolts tatawng determinado nga tablahon ang best-of-five series ug naglabaw kini’g 15puntos, 46-31, sa halftime.

Sa pagpangulo ni Jared Dillinger, ang Gin Kings hinayhinay nga ningbangon hangtod nga nailog nila ang labaw, 64-60, pagkahuman sa 3rd quarter.

Sa 4th quarter, grabe na kasikit ang kombati diin nagpulipuli paggunit sa labaw ang duha ka mga kampo.

Ang Gin Kings katapusang nakatilaw sa labaw, 80-78, sa nahabiling 1:25 minutos sa panagkumboya nila ni Pringle ug Japeth Aguilar.

Human niini, grabe ang pahugtanay og bakus sa duha ka mga kampo apan ningpabor sa Bolts ang kahigayunan ning mga puntoha.

Ang Gin Kings gipangulohan ni Pringle pinaagi sa iyang 18 puntos, nitunol og 15 puntos si Dillinger, niamot og 13 puntos si Scottie Thompson samtang nihatag og 12 puntos si Aguilar. (ESL)