GIBUTYAG sa kanhi undisputed heavyweight world champion Lennox Lewis nga motan-aw siya sa umaabot nga panagharong sa mga retiradong sila si Mike Tyson ug Roy Jones Jr. bisan usa lang kini ka exhibition bout.
Ang away nila ni Tyson, 54, ug Jones, 51, gikatakda karong Nobiyembre 29, (RP time) sa Staples Center sa Los Angeles, USA.
Si Lewis, kinsa usa sa mga nakapilde ni Tyson kaniadto, nagtuo nga kulbahinam ang away bisan usa lang kini ka exhibition bout gumikan sa kalibre sa duha ka mga boksidor.
“Everybody loves Mike Tyson. Everybody loves Roy Jones. They just want to see them in the ring again. It’s not a bad thing. At this age I actually think it’s good that he can push himself to step back into the ring,” matod ni Lewis sa interbyu sa boxingscene.com.
Alang kang Lewis, maglisod si Tyson ning awaya gumikan sa kaabtik ni Jones.
“You have to remember how Roy Jones is. Roy Jones is one of the quickest fighters out there. He moves around the ring. He’s not going to be an easy target,” batbat ni Lewis.
Hinuon, gitataw ni Lewis nga delikado si Jones kon maabtan kini ni Tyson. (ESL)