Sa 3,003 ka mga barangay sa Central Visayas, 672 niini drug cleared na, butyag sa
Philippine Drug Enforcement Agency (PDEA)-7.
Apil na ning mao nga gidaghanon ang 12 ka mga barangay sa lungsod sa Barili, Sugbo nga gideklarar nga drug cleared ni PDEA 7 Regional Director Levi Ortiz sa usa ka seremonyas sa Miyerkules, Nobiyembre 25, 2020.
Kini naglangkob sa Barangay Bugtong Kawayan, Cabcaban, Cagay, Luhod, Lupo, Luyo, Maigang, Pancil, Pang-Pang, Santa Ana, Tal-ot, ug Tubod.
Matag barangay kapitan gitunolan nila ni Ortiz ug Barili Mayor Julieto Florez og certificate nga nagmatuod nga drug-cleared na ang ilang barangay.
Matod ni Ortiz, ilang paninguhaon nga sa di pa matapos ang termino ni Presidente Rodrigo Duterte, mahanaw na sa tanang mga barangay ang illegal drugs.
Iya usab nga gipahimangnoan ang barangay officials sa di pagkompyansa bisan drug cleared na.
“Ila gyud nang monitoron permanente ang ilang mga residente nga kon wala na ba gyud nibalik sa pagkalambigit sa drugas sanglit nga dunay posibilidad nga ma revoke ang ilang pagka drug cleared,” sulti ni Ortiz sa Superbalita Cebu.
Samtang si Flores nihatag og tag P10,000 ngadto sa mga barangay nga drug cleared.
Matod sa mayor nga kini naapil sa budget sa ilang Municipal Anti Drug Abuse Council (Madac).
Gikalipay usab sa mayor ang mga barangay nga naningkamot samtang iya usab giawhag kadtong mga nahibilin sa pagpaningkamot aron ma drug cleared.
Dungan sa seremonyas, duna usay 215 ka mga drug surrenderer ang migradwar sa ilang ikaduhang hugna sa community based treatment and rehabilitation program (CBT) sa lungsod.
Gipanghinaut sa mayor nga seryoso na kining mga tawhana sa ilang pag bag-o ug dili na mobalik pa sa ilang kaniadto nga bisyo. (BBT)