ANG Cebu City Government mo-release sa financial assistance ngadto sa 12,000 ka mga persons with disability (PWD) sa Dakbayan sa Sugbo sa Disyembre 2-15, 2020.
Kini ang gipahibawo ni City Administrator Floro Casas Jr., ubos sa direktiba ni Mayor Edgardo Labella, kay wa na sila makadawat sukad niadtong Hulyo tungod sa coronavirus infections ug quarantine.
Matod ni Casas, P6,000 ang madawat sa mga PWD. Ang mga PWD ug senior citizens dunay tag P1,000 nga madawat matag buwan.
Matod ni Casas nga sama sa distribution sa senior citizens, ihatod ang P6,000 ngadto sa tagsa-tagsa ka mga balay sanglit anaa pa ang pandemya dala sa Covid-19.
Giawhag ang mga PWD sa pag-andam sa ilang mga identification card (ID) gikan sa Department of Social Welfare and Services (DSWS) ug ballpen para sa ilang pagpirma aa payroll.
Samtang ang distribution sa hinabang sa mga senior citizen isunod sa paghatag apan wala pa matino nga petsa.
Si Casas nagkanayon nga P4,000 kun upat ka buwan ang kobrahunon sa mga lolo ug lola nga posible nang ipaagi sa cash card sa Landbank of the Philippines. (PAC)