ANG Cebu City Jeepney Task Force (CCJTF) nakapadagan na og 123 ka mga tradisyonal nga public utility jeepney (PUJ) sa kadalanan sa Dakbayan sa Sugbo sa Miyerkules, Nobiyembre, 25, 2020.
Kini ang gibutyag ni Konsehal James Cuenco, chairman sa CCJTF, human sila nakadugang og 33 ka mga unit sa Nobiyembre 24 ug 25 human ang units ug drivers nakapasar sa mga lagda sa joint task force ug naisyohan na og special permit.
Ang mga rota nagagikan ug paingon sa barangay Guadalupe, Lahug nga tanan moagi sa merkado publiko sa Carbon.
Niadtong Nobiyembre 24, adunay 11 nga naaprobahan nga mobiyahe sa Labangon ug Pardo ug sa Nobyembre 25, adunay 21 nga naisyohan para sa barangay Talamban, Lahug,Pardo ug Labangon.
Silang tanan nakakumpleto na sa mga rekisito nga gipangayo sa joint task force gikan sa unang proseso hangtod sa pagkuha og mga travel line, identification (ID) cards ug pasado sa Inter-Agency Task Force ang ilang desinyo sa PUJ.
Samtang gipadayag ni Cuenco nga naka-swab test sila og 225 gikan sa 400 ka mga TPUJ drivers atol sa unang adlaw sa pool testing kagahapon, Nobyembre 25 nga maoy direktiba sa Department of Health.
Matod ni Cuenco mga magpadayon ang pool testing hangtod sa Biyernes, Nobyembre 27.