DAW dunay party nga nahitabo sa usa karsada sa Barangay Mabolo, Dakbayan sa Sugbo sa mga pasado alas 11 sa buntag sa Miyerkules, Nobiyembre 25, 2020 dihang nagdungan pagpangabot ang 42 ka mga Food Panda rider.
Ilang gihatod ang order sa 7-anyos nga batang babaye nga nigamit sa online app sa pag-order og pagkaon sa usa ka sikat nga fastfood chain.
Tungod sa pag-lag sa phone ug niresulta sa error, inay usa lang unta ka two-piece chicken fillet, daghan ang napahatod sa bata kay nagbalikbalik siya sa pagpindot.
Matag chicken fillet nga duna nay rice ug French fries balor og P189, dala na ang delivery fee. Kon kada rider dunay tag usa ka order, ang kinatibuk-ang mabayran unta P7,938.
Apan matod ni Dann Kayne Suarez, silingan ug nitabang sa pagpamaligya, dunay mga rider nga nagdala og duha ngadto sa tulo ka order sa balay sa bata sa may Our Lady of Remedy Street hinungdan nga mas dako pa ang balor ini.
Ang bata nga giingong nikupot sa cellphone, ni-order og pagkaon sa usa ka inilang fastfood chain pinaagi sa Food Panda, usa ka app online.
Subay sa Facebook live video ni Suarez, ni-lag ang internet connection sa cellphone nga gigamit sa bata atol sa pag order hinungdan nga ni-glitch ang app.
“Ingon nila tig-orderan gyud ang bata kay nakasalig na ba. Ang nahitabo kay nagsige siyag order nihinay ang connection nila. Meaning mi-error siya. Kay mi error mipindot na pud siya og laing order, sige lang gihapon siya,” matod ni Suarez sa interbyu sa Superbalita Cebu.
Busa, inay usa lang, 42 ka riders ang nangabot sa ilang dapit hinungdan nga nakurat ang mga silingan.
Ang bata nga nasayod nahadlok, matod ni Suarez, nihilak. Kauban sa bata sa balay mao lang ang apohan nga babaye kay ang mga ginikanan nanrabaho.
“Nihilak tawon ang bata. Luoy lagi, wa man siya kabalo,” matod ni Suarez.
Human sila masayod, nagtinabangay sila pagpamalit kay naluoy sa mga rider ug sa bata.
Tuod man, may nahalin nga di moubos sa 20 ka mga orders. Apan tungod kay duna pa’y laing deliveries ang ubang riders, wa na kini makapaabot, dunay namiya nga nasagmuyo kay wa mabayri.
Gisuwayan pagkuha sa Superbalita Cebu ang habig sa Food Panda, apan wala’y tubag nga nadawat.
“Hinaot guys, i-monitor nato ang atong mga bata kon mo order mogamit sa phone. Pero sa ani na case, ang internet nila nag lag, so na multiple order,” asoy ni Suarez pinaagi sa updated post sa Nobiyembre 25.