SA AKONG nahimamat ug nakaila nga mga pulitiko, lahi si anhing north district Congressman Raul Del Mar. Lahi ang iyang kinaiya isip pulitiko. Dili sama sa uban nga mas daghan ang pasiatab o estorya kay sa buhat. Dugay na nakong nahigala si Cong. Del Mar, mga 30 ka tuig na siguro. Gusto siya nga amigohon ang tanan bisan gani ang iyang mga kaatbang sa pulitika.
Panahon sa kampanya, wala ako makadungog nga midaut siya sa iyang mga kontra. Sa iyang mga diskurso, wala siya mangataki sa iyang mga kaatbang. Iya lang ipresentar ang iyang mga program ug plata porma de gobiyerno. Human sa eleksiyon, iyang amigohon ang iyang mga kontra ug mag-uliay sa maayong kabubut-on ug relasyon. Pangutan-a ang iyang mga kaalyado ug kaatbang sa pulitika di ba mao usab kini ang ilang obserbasyon.
Daghan og nahatag ug naimplementar nga mga proyekto si Cong. Del Mar sa iyang distrito ug napasar nga mga balaod, ma-lokal o nasyonal nga katuyuan. Walay isyo kabahin sa kurapsiyon. Wala ko moingon nga limpiyo ug santos si Del Mar. Siya maoy amahan sa pagmugna sa Mactan Cebu International Airport Authority (MCIAA) ug Cebu Port Authority (CPA). Nakapatukod og mga school buildings ug ang extension buildings sa Vicente Sotto Memorial Medical Center (VSMMC), mga sports complex sa matag barangay, flyovers ug mga skywalks.
Gumikan kay anak man siya ni Jose Maria Del Mar, kanhi peryodista panahon sa mga Kastila, anaa ang pagmahal ni Del Mar sa media industry. Daghan siya og natampo alang sa kaayuhan sa media sa Sugbo. Nakatampo siya ug si anhing south district Congressman Tony Cuenco sa Cebu Media Medical Aid Fund, pagtukod og press center ug media library og daghan pa.
Asa may maayo nga atong awhagon og hangyuon kining maong mga institusyon nga mohatag og pasidungog ni Del Mar nunot sa iyang mga nahimo ug legasiya? Atong awhagon ang kadagkuan sa MCIAA ug CPA nga mobutang og sculpture o human sized nga estatuwa ni Del Mar sa ilang compound. Ang V. Sotto mohingalan og usa sa ilang mga edipisyo ni Del Mar. Ang city government mohingalan og usa ka eskuwelahan ug kalsada alang kang Del Mar. En la memoria de (in memory of) Cong. Del Mar.