SA bag-ong gipagawas nga mga panglantaw sa mga ekonomista, base sa lakat sa negusyo karon, ang Pilipinas gilantaw nga labing ubos nga performer sa mga nasod sa Association of Southeast Asian Nations (Asean). Resulta kini sa mga lockdown sa nangaging mga buwan tungod sa nagsaka kanaug nga mga kaso sa coronavirus disease (Covid-19).
Bisan gani ang oversease remittances gikan sa mga oversease Filipino worker (OFW) mius-us og pipila ka bilyon ka dolyar. Labing apektado niini mao ang naa sa mga cruise ship nagtrabaho, apil na ang construction workers nga nagtrabaho sa abroad.
Sukwahi kini sa lakat sa ekonomiya sa 2019, diin gipanglantawan ang taas nga kanunay nga pagsaka sa Pilipinas.
Ang pagpabangon sa ekonomiya naa sa mga kamot sa kagamhanan kay sila man ang nagpatuman sa mga polisiya. Mag-unsa man ang business sector kon ang polisiya ug pagtimon sa kagamhanan di maayo. Sama gud sa usa ka barko nga naglawig taliwa sa kadagatan samtang gihapak sa dagkong mga bawod ug gikuso-kuso sa barko, gikinahanglan ang maayong manimon.
Apan ning kombate sa Covid-19, gikinahanglan usab ang kooperasyon sa tanang mga lumolupyo sa nasud. Kay ang mga quarantine level gibase sa kadaghanon sa nangatakdan ug kapaspas sa pagpanakod sa usa ka dapit. Mahimong sa usa lang ka pamilok, gikan sa modified general community quarantine (MGCQ) nga maoy labing ubos, ngadto na sa enhanced community quarantine (ECQ). Sa ECQ limitado kaayo ang mga industriya nga gitugtang maka-operate. Ang ekonomiya maorag gigapos og maayo, di na hapit makalihok. Di lang kay ang negusyo maoy alkanse, apil na niini ang kagamhanan nga nag-agad sa mga buluhisan sa ilang panudalanan.
Busa, ingon niana ka dako ang papel sa matag usa. Bisan usa lang gud ka tawo, mahimo siyang makapanakod og labing minos 100 ka tawo. Ang tag usa sa 100, makatakod og laing 100.
Busa, unta matag usa, mohimo sa iyang pahat aron ang ekonomiya makabangon na.