WALA nay kinabuhi nga nakaplagan ang mag-uuma alas 2 sa hapon niadtong Miyerkules human mahulog sa kanal tungod sa kahubog niini.
Naila ang biktima nga si Soriano Calmaba Baan, 50, biyudo, nagpuyo sa Purok Sambag, Barangay New Rizal, M'lang, North Cotabato.
Sa taho gikan sa Municipal Disaster Risk Reduction and Management Office (MDRRMO-M'lang), nakadawat sila og taho nga dunay naglutaw-lutaw nga patay nga lawas sa water impounding sa National Irrigation Administration-Soccsksargen, duol sa gipuy-an sa biktima.
Abtik nga nagresponde ang mga ginsakpan sa MDRRMO, kapulisan, mga opisyal sa barangay, lakip na mga sakop sa Bureau of Fire Protection (BFP).
Nakompirma sa mga awtoridad nga ang naglutaw nga patay nga lawas sa kanal mao ang kang Baan.
Sa wala pa makaplagi ang patay nga lawas sa biktima, nasayran nga mitambong siya sa pamalaye sa iyang paryente ug hubog nga miuli sa iyang gipuy-an.
Gidala dayon ang patay nga lawas sa mag-uuma sa usa ka punerarya sa M'lang. (Edgar E. Fuerzas)