PATAY diha-diha dayon ang usa ka albularyo human gipusil sa wala mailhing suspek sa Barangay Poblacion, Makilala, North Cotabato alas 7:30 sa buntag, Miyerkules, Nobiyembre 25, 2020.
Giila ang biktima nga si Ulysses Manligro Merabueno, 49, minyo, nagpuyo sa Sitio San Nicolas, Barangay San Vicente, Makilala, North Cotabato.
Sumala kang Makilala Chief of Police Major Arnel Melocotones nga sakay si Merabuena sa iyang motorsiklo gikan namalengke ug pauli na unta sa iyang balay.
Pag-abot niini sa Purok 28, Barangay Poblacion sa nahisgutang lungsod, kalit lang siyang gitaparan sa riding in tandem suspects ug gipusil gamit ang .38 revolver, diin upat ka mga samad ang naangkon sa nagkadaiyang bahin sa lawas.
Sa follow-up operation sa Makilala Municipal Police Station, nadakpan sa kapulisan ang usa sa mga suspek nga nailang si Robin Sarol Lonzaga, 55, minyo, nagpuyo sa Purok 8, Barangay Sto. Niño.
Narekober sab gikan sa posisyon ni Lonzaga ang .38 revolver, mga bala ug usa ka granada.
Ang suspek gibalhog sa selda sa Makilala Municipal Police Station ug gitakda nga pasakaan sa kasong pagpatay samtang gipangita pa ang kauban niini nga maoy nagmaneho sa motorsiklo. (Edgar E. Fuerzas)