BANSALAN, Davao del Sur - Nakurat ang mga konsumante human kalit nga misaka ang presyo sa karneng baboy sa merkado publiko ug mga meat shops dinhi sa lungsod.
Sumala sa konsumanteng si Anna, 35, nga namalengke siya niadtong Miyerkules dihang nasayran nga mokabat na sa tag P250 ang kilo sa perna, P260 ang tiyan ug P200 ang bukog sa karneng baboy.
Mokabat sa P80 ang gisaka sa presyo sa karne sanglit anaa lamang kini sa P180 ngadto P190 sa milabay'ng bulan.
Gipasabot sab sa meat vendor nga si Inday nga nagnihit ang mga baboy maong naglisud sila pagpangita og suplay sa baboy.
Usa sa ilang gitudlong hinungdan mao ang nahitabong pagpamatay sa mga baboy dihang miigo ang African Swine Fever (ASF).
Apan sa pagtawag sa Sun.Star Superbalita ngadto kang Beth Tronio, PR officer sa Department of Agriculture-XI, giklaro niini nga wala nagkuwang ang suplay sa baboy sa Davao Region.
Matud niya nga bisan ang mga ham nga "in demand" panahon sa Pasko aduna'y igong suplay.
"So far, wala man ta'y namonitor nga kulang na ang atong suplay, seguro ang DTI (Department of Trade and Industry) maoy dapat mag-monitor sa presyo ana," pasabot ni Tronio.
Sa pagsuwat ning balita, wa pa'y tubag ang DTI kung unsay tinuod nga rason sa kalit nga pagtaas sa presyo sa karneng baboy sa lungsod. (Orlando B. Dinoy)