Dako akong uyon nga ibalhin ang provincial Capitol ngadto sa Balamban. Unang katarungan mao nga ang Kapitolyo, sa pagka-karon, anaa nagbarog sa yuta ubos sa hurisdiksiyon sa Cebu City. Mahimo na lang unya kining ipabilin kay gideklarar naman kini nga heritage site sa National Historical Commission of the Philippines (NHCP).
Ang unang naka-hunahuna sa pagbalhin sa Kapitolyo mao si kanhi gobernador Lito Osmena apan wala siya makapatuman niini. Karon, si Gob. Gwen Garcia kusganon kaayo sa pagbalhin niini sa Balamban diin tukorun na unya ang provincial government center. Gani aduna nay gahin nga P550 milyon sa proposed 2021 budget alang sa pagpalit og yuta ug pag-ugmad niini.
Ang Balamban sayun kaayo nga maabut pinaagi sa maayong kadalanan sa norte ug south. Mahimo usab kining agiun sa Transcentral Highway. Adunay unya kini mga balay alang sa mga empliyado aron dili na sila mahasul sa pagbalik-balik dinhi sa siyudad.
Ang labing dakung kaayuhan nga mahimo niini mao ang kaugmaran sa kasadpang bahin sa lalawigan sa Sugbo. Gawas sa shipbuilding industry sa maong dapit, gipaabut nga mamungingi na unya kini sa nagkalainlaing negosyo nga maoy motanyag sa mga panginahanglan sa mga empliyado ug mga kliyente sa Kapitolyo. Nagtuo gani ako nga daghan na karong negosyante nga nag-interes nga magbutang og negosyo sa maong dapit. Kini maoy pruyekto nga angay paluyohan aron mapatuman dayon.
* * *
Maayo usab kining pag-abli na ni Gob. Garcia sa mga tourist destinations sa Sugbo. Karong bag-o iyang giablihan ang Malapascua Island alang sa mga turista. Daghan ang una niyang giablihan nga mga tourist destinations sa lalawigan. Dako kinig matabang aron pagbangun sa ekunomiya nga nahagba tungod sa Covid – 19. Maayo nga sa wa pa ang pandemic, daan nang gi-promote sa gobernador ang mga tourist destination, apil na ang mga produkto, sa matag lungsod sa probinsiya. Na-promote kini pinaagi sa “Suroy-suroy sa Sugbo” nga gihimo matag karon ug unya. Ang mga lungsod nga dako og kita gikan sa mga turista mao ang Oslob, Moalboal, Bantayan ug siyudad sa Lapu-Lapu. Ang nakaayo niini kay direkta kining maka-benepisyo sa mga lumolupyo mismo sa dapit diin nahimutang kining maong mga destinasyon.
* * *
Sa US presidential elections, klaro na ang pag-asumir ni President-elect Joe Biden tungod kay pormal nang gitugotan ang iyang transition team nga mohimo sa ilang trabaho ingon man makadawat na og briefing si Biden kalabut sa national security concerns, ug uban pa. Gipa-ila na ni Biden ang uban niyang mga sakop sa gabinite. Hinaut pang dili na magkagubot ang mga dumadapig sa duha ka mga partido aron masulbad ang mga dagkung problema sa US nga mao ang coronavirus ug ekonomiya.
(mannyrabacal1144@gmail.com)