WA PAY tambal sa hilabihan ka mananakod ug makamatay nga SARS-CoV-2, kagaw sa Covid-19. Apan mokabat sa 150 ka mga vaccines batok sa Covid-19 ang gi-develop sa mga scientists sa mga laboratoryo sa nagkalain-laing dapit sa kalibotan.
Labing menos tulo niini gikatahong luwas ug epektibo. Mao kini ang mga bakuna nga gi-develop sa University of Oxford sa United Kingdom ug AstraZenica, Pfizer sa Estados Unidos ug BioNTech sa Germany ug sa Moderna Therapeutics ug National Institutes of Health.
Ang pangutana mao kon kanus-a pa moabot dinhi sa Pilipinas ang maong mga bakuna batok sa Covid-19?Ang adunahan nga mga nasod sama sa Estados Unidos nibayad na bisan nagpadayon pa ang mga clinical trial sa mga bakuna. Kita mangutang pa.
* * *
Si Undersecretary Carlito Galvez Jr., chief implementer sa National Task Force Against COVID-19, namahayag nga naglaraw ang gobyerno nga bakunahan batok sa coronavirus ang 60 ngadto sa 70 porsento sa mga Pilipino sud sa tulo ngadto sa lima ka tuig.
Matod pa ni Galvez mokabat sa 20 ngadto sa 30 milyones ka mga Pilipino ang mahimong mabakunahan matag tuig. Gibana-bana nga mogasto ang gobyerno og pasiuna nga P73 bilyones alang niini alang sa duha ka dose matag tawo ug ubang gastohanan sama sa mga syringes ug mobilization.
Ang gobyerno, matod niya, nangandam og loan nga P73 bilyones gikan sa World Bank ug Asian Development Bank nga makuha dayon sa higayon nga maaprobahan na ang mga bakuna batok sa coronavirus, hayan sa Disyembre.
* * *
Si Galvez niingon nga nangandam ang gobyerno og hangtod P150 bilyones sa pagpalit og bakuna. Ang Department of Health (DOH) nihatag nag listahan ngadto sa task force sa 35 milyones ka mga Pilipino nga unahon sa pagbakuna, hayan sa second quarter sa 2021.
Lakip sa priority recipients sa bakuna ang mga health-care workers, mga sakop sa kapulisan ug militar, mga essential workers sa Department of Social Welfare and Development ug Department of Education, mga senior citizens ug mga kabus.
Unahon usab ang mga lugar nga grabeng gihugpaan sa Covid-29 sama sa Metro Manila, Calabarzon ug Central Luzon ug ang mga syudad sa Cebu, Davao ug Cagayan de Oro. Apan samtang wa pay bakuna, amping tang tanan. Kanunay nga paghugas sa mga kamot, social distancing ug pagsul-ob sa face mask.