Usa sa mga kahuyangan sa kagamhanan mao ang pagpatuman sa mga balaud, bisan gani sa trapiko. Bisan sa pagpamuhi og iro naay nakalatid sa balaud, apan tan-awa karong panahon sa pandemic, nagkatag sa karsada.
Way gibuhat ang kagamhanan o kon naa man gani, diyutay ra. Ang solusyon mao ra ang pagbutang og anti rabies center sa mga health department, wa ang paghimo og mga lakang pinaagi sa pagpatuman sa balaud aron way mapaakan.
Laing balaud nga kon ma-apply sa karsada, mas mahimong luwas ang pagpadagan sa sakyanan. Mao ni ang Anti-Distracted Driving Act nga hugot nga gipatuman sa pagsugod, apan paglabay sa pipila ka mga buwan, wa na masunod. Kadaghan sa mga driver nga magtubag og tawag samtang nagmaneho nga gitan-aw ra, apan wa dakpa.
Dunay anti-noise ordinance, apan wa mapatuman. Gikinahanglan pang mag-quarantine ug mag no face-to-face classes.
Bisan ang pagpatuman sa mga protocol sa quarantine maorag dunay gipili kay sagad sa madakpan ug mapahamtangan og silot, mga kabus lang. Mga opisyal nga nakahimo sa kalapasan, wa masikop tungod sa ilang gahom.
Gikinahanglan ang pagkamakanunayon sa pagpatuman sa balaud, bisan asang dapit, bisan kanus-a ug si bisan kinsa. Mao ni ang dako nga kuwang sa kagamhanan, labina sa mga pulitiko nga kanunay naghuna-huna sa botos.
Tingali, di magkagubot ang karsada, disiplinado ang drivers ug way mag-away nga mga silingan tungod kay nakapaak ang iro. Ang problema wa sa balaud, kon di nag-agat sa kakuwangan sa pagpatuman.
Kon naa pay pagpatuman nga hugot sa balaud, kanang pinasubay, di palab-anan, hayan disiplinado ang mga Pinoy. Kay kon naa sa abroad, nganong mosunod man ang tanang nanglalin sa mga balaud? Kay sa ubang nasod, consistent kun kanunay ang ilang pagpatuman ug pagpahamtang og silot. Nagtangag pa og dakong mga multa.
Kon kanunay pang gipatuman ang mga balaud, di gubot ang nasod, hapsay ang dagan kay ang mga tawo maananad na pagsunod.