Ang legendary basketball player nga si Michael Jordan midonar og $2 milyones aron gamiton sa pagpalit og pagkaon sa mga tawo nga nanginahanglan.
Gitunol sa six-time NBA champion ang iyang donasyon ngadto sa non-organization group nga Feeding America.
Dali dayon kining gibutyag sa maong organisayon pinaagi sa Twitter kagahapon.
“An incredible gift to be thankful for—NBA legend Michael Jordan is donating $2 million to help our neighbors facing hunger #TheLastDance,” suwat sa Feeding America sa ilang Twitter account.
Ang maong kantidad nga gi-donar ni Jordan parti sa kita sa blockbuster hit nga documentary series nga the Last Dance nga gi-release niadtong Abril, 2020.
Ang Last Dance nagdokumentaryo sa career ni Jordan sa NBA og giunsa niya pag-aswat ang Chicago Bulls ngadto sa unom ka kampiyonato.
“In these challenging times and in a year of unimaginable difficulty due to COVID-19, it’s more important than ever to pause and give thanks,” batbat ni Jordan sa report sa TMZ.
Dugang ni Jordan nga mapasigarbuon siyang mi-donate sa parti sa iyang kita ngadto sa Feeding America ug sa uban nilang miyembro nga food banks sa Chicago kay makatabang kini sa pagpakaon sa mga gigutom.
Matod sa Feeding America nga konektado sila sa 200 ka food banks ug 60,000 ka food partners sa tibuok Estados Unidos.
Ilang giawhag ang uban nga mosunod unta sa gibuhat ni Jordan.
Daghan ang nakadayig sa pagtabang ni Jordan pinaagi sa iyang gikita sa Last Dance.
“A true American hero...as well as perhaps the best basketball player who ever lived,” suwat Albert Neal.
“Michael Jordan has restored my faith in humanity. God bless him,” dugang ni Sheila Couvillion.
Si Jordan maoy gikonsiderar nga greatest player of all time tungod sa impact nga iyang nabuhat sa Chicago Bulls ug sa tibuok NBA.
Ang third overall pick sa 1984 NBA Draft nahimong six-time NBA champion, six-time Finals Most Valuable Player (MVP), five-time NBA Season MVP, 14-time All Star, two-time Slam Dunk champion, Rookie of the Year, ug uban pa.
Nailhan si Jordan tungod sa iyang kalutaw moduwa og kanindot sa iyang mga estilo apil na niini ang iyang pagka-clutch player.
Usa sa iyang iconic shot mao ang two-point jumper sa Game 6 sa 1998 NBA Finals nga maoy nilunod sa Utah Jazz og gahatag kang Jordan sa iyang ikaunom nga titulo.
Mao kato ang katapusang itsa ni Jordan isip miyembro sa Bulls kay miretiro man kini pagkahuman sa season.
Mibalik si Jordan sa NBA isip miyembro sa Washington Wizard niadtong 2001 ug miretiro sa tuig 2003. (RSC)