SUPERBALITA CEBU

Balik lantaw sa Sugbo kaniadto

Kon maghisgot ta og karaang mga edipisyo nga nakasaksi sa daghang mga panghitabo sa Sugbo, usa sa mosud sa atong hunahuna ang Cebu Provincial Capitol.

Sa Kapitolyo, nag-opisina ang mga opisyal nga nagpadagan sa renda sa pangagamhanan sa lalawigan sa Sugbo. Anaa kini nahimutang sa kinapusurang bahin sa Dakbayan sa Sugbo.

Ang Kapitolyo giisip nga usa sa mga iconic nga edipisyo sa siyudad sa Sugbo kay nagbarog kini sa starting point nga kilometer zero.

Ang nagdesinyo niini mao si Juan Arellano, nga mao usab ang nagpaluyo sa desinyo sa Metropolitan Theatre sa Manila, National Museum of the Philippines ug Manila Central Post Office Building.

Gisugdan og tukod ang building 1937 ug nahuman og tukod 1938.

GALLERY

Sa usa sa mga lawak sa Kapitolyo, anaa ang Governors’ Gallery. Makita dinhi ang mga handumanan, karaan ug makasaysayanon nga mga butang nga ang uban napreserbar sa paglabay sa taas nga katuigan.

Anaa kini gipahimutang sa lawak nga kanhi gigamit isip buhatan ni Gobernador Gwendolyn Garcia sa iyang naunang tulo ka mga termino.

Ang Governors’ Gallery gibahin sa duha ka parte: ang Historical Section ug Memorabilia Section.

Si Garcia ang nakahunahuna nga magbutang og gallery sa Kapitolyo diin makita ug naka-display ang karaang mga butang, ang uban nagamit sa mga kanhi opisyal sa probinsya. Ang ubang mga handumanan sa nangaging mga kasaulogan ug panghitabo sa Sugbo.

Sa Historical Section, makita ang 25 ka charcoaled portraits sa mga kanhi gobernador sa probinsya sa Sugbo.

MAKASAYSAYANONG LAMESA

Anaa usab sa maong section ang 83 anyos na nga lamesa nga magamit pa gihapon. Nagama kini niadto pang 1937, dungan sa pagtukod sa Kapitolyo.

Matod ni Ian Fresnido, interior consultant sa gobernador, tulo ingon niini nga lamesa ang anaa pa. Ang usa naa sa gallery, ang laing usa naa sa buhatan sa Provincial Administrator.

Samtang ang lain pang usa gigamit ni Garcia sa mga unang adlaw sa iyang pagbalik pagka gobernador sa probinsya.

Pag-abot sa lamesa sa gobernador, ang ikatulong lamesa gipadala ngadto sa Museo Sugbo alang sa pag-display.

Laing makasaysayanon nga lamesa mao ang gikan-an ni anhing presidente Diosdado Macapagal.

Asoy ni Fresnido sa maong lamesa nikaon si Macapagal sa iyang paniudto atol sa iyang pagbisita sa Pilar, Isla sa Camotes, dihang si Martin Malaloan pa ang mayor sa lungsod niadtong 1960s.

Human sa 50 ka tuig, ang anak ni Martin nga si Reynaldo Malaloan, kinsa nahimo usab nga mayor sa Pilar, ni-host og dinner sa iyang bisita nga si kanhi presidente ug anak ni kanhi presidente Gloria Macapagal-Arroyo.

MEMORABILIAS

Sa Memorabilia Section, naka-display ang folding nga lamesa nga hinimo sa puthaw. Kini mga lamesaha komon niadtong dekada 50 ug 60.

Dihang gisusi ni Fresnido uban sa inila nga anthropologist ug consultant usab sa Kapitolyo nga si Professor Jojo Bersales, apil sa ilang nasalbar ang original ug dako nga pultahan sa ganghaan sa Kapitolyo. Kini nga folding doors kay ginama sa puthaw.

Sa gallery usab, naka-display ang swivel chair nga uso na niadto pang 1950s ug 1960s.

Anaa usab ang karaan nga mga libro nga Kinatsila ang pagsuwat. Kini ang Kodigo Civil Español nga niadto pang 1893 na-imprinta.

Apil usab sa makita sa gallery ang Leyes Publicas Lehislatura Filipina o Public Laws Philippine Legislature nga niadto pang 1920s.

Naka-display usab ang kopya sa Sugbo sa Official Gazette sa Malacañang. Kini napunitan usab nila ni Fresnido ug Bersales sa junkyard sa Kapitolyo.

Kini nga publication sa Malacañang, matod ni Fresnido, daw sama sa usa ka diary sa presidente diin naka-record ang iyang mga kalihokan, mga dapit nga gipangduaw ug unsay gipangbuhat niini.

Usa sa na-record sa official gazette ang pagbisita ni anhing presidente Diosdado Macapagal sa lungsod sa Barili dihang si Espina pa ang gobernador sa Sugbo.

Makita usab sa gallery ang mga butang nga hinatag sa nibisita nga mga opisyal sa Sugbo.

Daghan pang mga butang ang naka-display sa gallery.

Matod ni Fresnido, mahinungdanon nga hatagan og bili kining mga butanga kay kini nagpahinumdom sa kasaysayan ug mga kaagi sa Sugbo.

Ang kagahapon sa Sugbo nagpahinumdom sa bag-ong henerasyon unsa ka maanindot ug makasaysayanon ang mga naagian sa Sugbo nga angay ipasigarbo sa mga Sugboanon.

Sumala ni Fresnido andam sila manawat og mga bisita sa gallery.

FREE

Libre ang pagsud sa gallery. Apan tungod sa health and safety protocol nga gimando sa gobiyerno, limitado una ang pagdawat nila sa mga bisita aron pagtamod sa physical distancing.

Abli kini gikan sa Lunes hangtod sa Sabado, gikan sa 9:00 sa buntag hangtod sa 5:00 sa hapon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!