Labing unang flight sa eroplano nga motugpa sa Bantayan Island Airport sakyan sa mga opisyal ug bisita sa mini Suroy Suroy kun SMB Escapade sa Biyernes sa buntag, Nobiyembre 27, 2020.
Pagsugod kini sa tulo ka adlaw nga mini suroysuroy sa mga lungsod Sta. Fe, Madridejos ug Bantayan sa mga isla sa Bantayan, Sugbo.
Tinguha ni Cebu Governor Gwendolyn Garcia ang pagbanhaw sa ekonomiya sa lalawigan sa Sugbo pinaagi sa pagbukas sa turismo sa probinsya.
Si Garcia, kauban ni Mactan Cebu International Airport Authority (MCIAA) General Manager Steve Dicdican ug Department of Tourism (DOT-7) Regional Director Shalimar Tamano maoy mangulo sa kalihukan.
Ang airport usa sa gipasigarbo sa probinsya sa Sugbo nga gilauman nga moagni pa og mas daghang mga turista sa isla.
Walo ka buwan nga napagan ang turismo ug mga establisimento tungod sa pagpatuman sa hugot nga quarantine restrictions taliwa sa pandemya.
Usa sa labing una nga suroyan sa mga turista ug bisita mao ang Ogtong Cave Resort sa Lungsod sa Sta. Fe. Sundan kini sa Kota Heritage Park sa lungsod sa Madridejos ug mobisita usab sa mga museum ug simbahan sa lungsod sa Bantayan.
Sa ikaduhang adlaw, mahimo usab nga mopili ang mga turista sa ilang buot bisitahon sama sa isla sa Sta. Fe kon diin naa ang maanindot nga Virgin Island ug Balidbid Lagoon, Bantayan Island Adventure Park ug Observation tour sa SM Fishers Corp.
Samtang sa ikatulong adlaw, ipahigayon ang misa sa Saint Peter ug Paul Parish sa Bantayan, hatagan usab og kahigayonan ang mga bisita nga makapalit og pasalubong sama sa buwad ug souvenirs. (ANV)