MOABOT sa 150 nga nagbarog nga estraktura ang nakababag sa rota sa Bus Rapid Transit (BRT) ug maoy problema karon sa Department of Transportation (DOTr).
Gawas sa mga estraktura, problema usab ang mga road-right-of-way (RROW) nga mas mahal na kon paliton karon itandi sa nangaging katuigan.
Si Cebu City Councilor James Anthony Cuenco, chairman sa committee on transportation, niingon nga anaa sa 150 ka estraktura nga nahimutang sa Escario ug Vestil Street ang maigo sa rota sa BRT.
Matod ni Cuenco nga kabalayan ang apektado sa Vestil St. samtang mga komersyal nga establisemento sa Escario St.
“Mag-widen man sila diri sa Vestil Road nya daghan kaayo og structures diri, mao nay bloody kaayo. Sa Escario sad, perennial problem man gyud na sa Escario,” matod ni Cuenco.
Matod niya nga nausab na sad karon ang sumada sa pagpalit sa mga properties. Kaniadto, zonal value ang basehan, apan karon market value na ug matod ni Cuenco, mas mahal.
Matod sa konsehal nga aduna say problema sa ubang properties nga maigo sa rota, apan dili tibuok lote ang paliton sa gobiyerno.
“There are some like sa Mambaling, naay usa nanag-iya og 2,000 square meters. Ang kailangan lang 1,700 square meters... the government can’t be allowed to buy the whole thing,” matod ni Cuenco.
Matod ni Cuenco nga nahuman na og sabot ang ubang tag-iya sa properties, apan wa pa mabayri hangtod karon.
Giawhag ni Cuenco ang ahensya nga kinahanglan buhaton kon unsa may gisaad.
Di sad uyon si Cuenco nga moabot pa sa expropriation sa korte ang pagkuha sa mga properties tungod kay mas makalangan kini sa proyekto.
NAKAHATAG NA
Si Norvin Ymbong, deputy project manager for systems and stakeholders relations sa BRT project, niingon nga naka-download na ang DOTr og P416 million ngadto sa Cebu City Government para sa land acquisition ug resettlement para sa mga apektado.
Matod ni Ymbong nga ongoing ang procurement para sa maagian sa phase one nga rota.
Matod ni Cuenco nga ang mabuhat lang sa Dakbayan sa Sugbo mohatag og tabang sa negosasyon sa property owners.
Ang Cebu City focal person sa BRT project, Roberto Varquez niingon nga ang problema sad sa road right of way (RROW) acquisition ang hinungdan sa realignment sa BRT project.
Sa orihinal nga rota, muagi kini sa N. Bacalso Ave. padung sa Bulacao nga nasayran sa engineers nga mas mahal kon ipadayon, matod ni Varquez.
Matod ni Varquez nga P17 billion ang budget para sa BRT karon.