4 kasugarol og hantak nadakpan

UPAT ka mga lalake ang gipusasan human gironda sa kapulisan ang hantakan sa Sitio Kawayan, Barangay Guadalupe, Dakbayan sa Sugbo niadtong Miyerkules sa alas 11:40 sa gabii.

Nasikop silang Rene Resurreccion, 48, minyo, ug nagpuyo sa nahisgutang lugar uban nila ni Roberto Laguido, 30, ulitawo; Felix Sabroso Mendoza, 42; ug Ariel Baynosa Soriano Jr., 23.

Gawas sa hantakan, nakuha sa kapulisan ang P98 nga pusta.

Si Captain Janelito Marquez, hepe sa Guadalupe Police Station nga nahinabi sa Superbalita Cebu, nagkanayon nga dunay mitawag sa ilang buhatan kabahin sa daghang mga sugarol naghantak daplin sa dalan bisan sa kagabhion bisan oras na sa curfew.

Wa maglangay ang iyang mga sakop ug naabtan nila ang daghang tawo nga nagsugal, nasakpan sa akto nga nag-antog sa hantakan.

Apan ang upat lang nasikop sa kapulisan human nakaipsot sa pagdagan ang uban dihang niabot ang awtoridad, sumala ni Marquez.

Dugang ni Marquez, ubay-ubay na ang ilang nadakpan sa nagkadaiyang sugal diha sa ilang area of responsiblity (AOR).

Ang mga dinakpan mag-atubang kinig kasong kalapasan sa P.D. 1602 kun illegal gambling.

Ang matayg sa uapt ka mga dinakpan gitugotan nga makabutang og P30 mil alang sa ilang temporaryong kagawasan.

Ang kapulisan nipasidaan nga sugaol sa paghunong na sa bisyo. (GPL)