USA ka kanhi seaman ang giposasan sa mga operatiba sa City Intelligence Unit (CIU) sa Cebu City Police Office (CCPO) tungod sa iyang iyang kaso didto sa korte sa Mindanao.
Si Police Major Randy Caballes, hepe sa City Intelligence Unit sa CCPO, nangulo sa pagdakop kang Alfred Tabanas Pacana, 51, nagpuyo sa Sityo Duljogan, Barangay Buhisan, Siyudad sa Sugbo, apan lumad nga taga lalawigan sa Zambonga Sibugay.
Si Pacana gidakop pinasikad sa warrant of arrest nga giisyu ni Judge Vicente Dela Paz sa Regional Trial Court (RTC) Branch 36 sa Ipil, Zamboanga Sibugay sa kaso nga kalapasan sa pagdala og eksplosibo ug ilegal nga drugas.
Matod ni Caballes, ang kaso ni Pacana kalabot na sa ilegal nga drugas dunay piyansa nga P40,000 aron kini makagawas apan ang iyang kaso sa paghupot og eksplosibo walay girekomenda nga piyansa.
Si Pacana nahibaloan nga tulo na ka tuig nga nagpundo sa Barangay Buhisan hangtud nga nasakpan kini nga duna diay giatubang nga kaso sa iyang lalawigan.
Si Pacana gipriso una sa CCPO samtang gihan-ay pa ang mga papeles sa pagbiyahe niini balik sa Mindanao aron pag-atubang sa kaso. (BBT)