ANG kapulisan sa Siyudad sa Sugbo naglisud sa ilang imbestigasyon sa pagpusil-patay kang Atty. Joey Luis Wee, 51, niadtong Nobiyembre 23, sa J. Panis St., Barangay Kasambagan, Dakbayan sa Sugbo.
Matod ni Police Lieutenant Colonel Wilbert Parilla, deputy city director for operation sa Cebu City Police Office (CCO), nga wala pa silay matumbok nga suspek ug anggulo sa kamatayon sa abogado tungod kay limitado pa ang impormasyon nga gihatag sa pamilya niini.
Dako unta, matod pa, og matabang ang pamahayag sa kabanay apan wala pa sila tubaga sa ilang hangyo nga mahinabi aron makakuha sila og kasayuran kung aduna bay hulga nga nadawat si Wee sa wala pa ang hitabo.
“Parallel investigation nalang ning atoa kay mura man og ang family murag mas gusto pa nila. Wala man hinuon silay gisulti pero mas hesitant pa sila mohatag og information diri sa atoa but beside ana nag conduct pa gihapon tag parallel investigation,” matod ni Parilla.
Ang asawa ni Wee nidangop sa buhatan sa National Bureau of Investigation (NBI) 7 nga gisugdan usab dayon sa maong ahensya ang pagsusi sa pamusil apan bisan pa man niini gipahibawo ni Parilla nga magpadayon ang ilang imbestigasyon.
Kung gitinguha sa pamilya nga ang NBI nalang ang mohupot sa kaso andam ang kapulisan sa Siyudad sa Sugbo sa pag-turn over sa ilang gihuptan nga ebidensya apan moimbestigar gihapon sila kutob sa ilang mahimo.
Naa na sa kustodiya sa kapulisan ang kuha sa CCTV camera lakip na ang basiyo ug kabhag sa bala nga nakuha sa crime scene. Ang duha ka killers nagtabon sa ilang mga nawong ug nisibat dayon sakay sa motorsiklo, kini base sa kuha sa CCTV camera. (AYB)