SAKOP ni Shiek Esmail Abdulmalik alyas Kumander Abu Toraife sa Bangsamoro Islamic Freedom Fighters (BIFF-Isis Inspired Group) ang napatay nga terorista alas 5:45 sa buntag niadtong Huwebes, Nobiyembre 25, 2020, sa Tacurong City.
Giila ang suspek nga si Abdul Rashid Soledad Lamalam nga dunay mga alyas nga Amher, Adbullah Lamtud ug Spike, 39, minyo ug molupyo sa Barangay Pagagawan, Datu Montawal, Maguindanao province.
Gikanayon ni Sultan Kudarat Police Provincial Office Director Colonel Noel Kinazo nga nakadawat sila og taho sa usa ka tawo nga sakay og motorsiklo nga dunay dala nga bomba ug mosulod sa Siyudad sa Tacurong.
Tungod niini, dali lang namatikdan si Lamalam sa mga awtoridad nga moagi sa police checkpoint sa Bario Dos sa maong siyudad, apan wa kini mihunong, inay mipaturatoy og padagan hinungdan nga nakalusot.
Dali nga nakapahimutang og blocking force ang mga pulis didto sa Barangay EJC Montilla sa siyudad.
Sa dihang nakita ni Lamalam nga giatngan siya sa mga pulis, nakigpinusilay dayon siya kanila gamit ang kalibre .45 nga pistola.
Wa siya makapiog sa mga awtoridad ug namatay human lima ka mga samad ang naangkon niini sa lawas.
Narekober gikan sa suspek ang usa ka motorsiklo, usa ka kalibre. 45 nga pistola, usa ka bag nga dunay sulod nga duha ka rifle grenade, cellphone ug mga kuryente.
Gituohan nga terorista buot manimalos sa kamatayon sa ilang kauban ug lider sa Dawlah Islamiyah Terrorist Group didto sa Polomolok, South Cotabato.