Nadela: Unang biyahe sa PUJ

Nakasakay ko sa labing una ug nag-inusara nga biyahe sa dyip nga nagruta og Inayawan-Colon niadtong Huwebes, Nobyembre 26. Kini gamaneho ni Eleazer Carriaga nga taga Pari-an dakbayan sa Sugbo.

Sukad nga nag-lockdown niadtong hinapos nga bahin sa bulan sa Marso kadto maoy una nakong pagsakay og balik sa pinaka karaan nga mass transport system sa tibuok nasod.

Wala ko kabantay nga ang dugay na nakong ginaabot nga kanunayng tawgon nga “Hari sa Karsada” nakabalik na diay nianang buntag sa maong petsa.

Sa dihang nasigpatan nako ang iyang pagpamasahero, nagdali ko nga nipara pasado alas 6 sa gabii. Tulo ra ming pasahero nga sila si Belen Alivio ug iyang anak nga dalaga nga si Belen nisakay gikan sa Laray. Hilabihang mingawa sa biyahe. Way laing pasahero nga nipara. Nanganaug nalang sila si Belen sa dalan Magallanes.

Sa wala pa sila manaug, si Belen nisulti nako nga hilabihan gyud niyang lipaya nga nisugod na og biyahe ang dyip.

Matod niya dako kaayo ang kahasol ang pagpaundang sa gobyerno sa mga biyahe sa dyip sa ilaha sa Laray. Dili lalim ang iyang sakrapisyo nga makaabot sa Carbon alang sa iyang panginabuhi sa pagpaninda.

“Kinahanglan mi nga magbaktas gikan sa Laray padulong sa Cogon Pardo aron makasakay og bus,” asoy ni Belen.

Tinuod gyud kay sa dihang gilibkas na ang enhanced community quarantine (ECQ) gipabiyahe sa city hall ang mga bus og walay labot ang dyip. Ang nakaparat kay wala malakip ang ruta alang sa mga magbubuhis sa Laray Inayawan nga ruta. Human manganaug sila si Belen nafsunod sunod na og sakay ang mga pasahero nga maagian sa ruta sa dyip ni Eleazer pabalik sa Inayawan.

Sa dalan Colon daghan ang nagpaabot og masakyan. Galing lang kay ang gitugot nga gidaghanon sa mga pasahero 12 ra ka buok alang sa iyang dyip nga Elf nga mokarga unta og 23 ka tawo apil ang front seat. Wala na sab itugot nga may makalingkod sa front seat.

Matod ni Maria Lequigan nga taga Basak San Nicolas dakong tabang alang niya nga manindahay sa Carbon niining paghibalik sa dyip.

Ang bus man gud nga moagi sa ilaha gikan sa Pardo para Colon puno nang daan sa pasahero. Gikan sa Colon padulong sa ilaha kinahanglan nga linyahan pa og taas kaayo aron makasakay.

Samtang ang mga tinun-an sa University of San Jose-Recoletos ug Cebu Technical University nga sila si John Carl Balbin ug Jee Merisa Yap, niingon nga dakong tabang para sa mga tinun-an ang biyahe sa dyip.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph