Sa kadaghan sa gihunahuna ug mga buhatonon para sunod ugma, ma trabaho o ginbuhaton sa balay, usahay lisod ipiyong og katulog.
Kumon kining mahitabo labi na karong panahuna nga padayon ang pagsaka sa mga na-apektuhan sa Covid-19 nga nakapa-usab sa atong inadlaw-adlaw nga tulumanon.
Niay akong nakuha nga mga sugyot gikan ni Dr. Willie Ong kung unsaon para makatulog og tarong og ma maayo ang pagmata.
Ang pinaka-una niyang sugyot mao ang sayo nga pagkaon sa panihapon mga 2 ngadto sa 3 ka oras una matulog igo nga mahilis ang kinaon. Unya aron di moburot ang tiyan mas maayong maglakaw-lakaw una og ginagmay sa palibot. Pina-agi ini malikayan ang paghapdos ug sakit sa tiyan tungod sa acid reflux.
Mas maayo sab nga di bugnaw nga tubig ng imnon human og kaon kanang medyo init-init gamay o ba kaha tsa sama sa Chamomile tea. Pwede sab mo inum og gatas o kaon og saging.
Angay likayan ang pag-inum og kape ug ilimnong makahubog kay bisan tuod og makalapoy kini sa lawas apan maka putol-putol kini sa katulog unya duna maka labad pa gayod sa ulo inig mata o hangover.
Suhod, andama daan ang imong mga gamit para sunod ugma: uniporme, gamit sa mga bata, balon og uban pa aron di magkara-kara inig mata.
Hinumdumi pagpangga imong kaugalingon. Sa iningles pa ‘pamper yourself’ pasabot e-relax ang kaugalingon, maligo, mag-shower, magbasa sa imong paboritong libro o magtan-aw sa imong gisunod nga telenobela.
Seguroon sab nga ang kwartong katulugan komportable, di alimo-ot, presko ang hangin, limpyo ug humot ang higdaanan, unlan og habol, unya ngi-ob ug hilom ang palibot.
Ayaw gayod pagkatulog kung walay panghilam-os o toothbrush kay ang hugaw, abog og mantika nga nahabilin sa imong nawong maoy makapabugas-bugas ug makapabaho sa gininhawa (bad breath).
Power down! Pasabot tangtangon ug palungon ang tanang electronic gadgets sama sa cellphone, laptop, o ipod para makapahuway ang utok ug makalahos pagtulog.
Katapusan, pangadye ug pasalamat sa tanang gasa ug grasya.