Mag-umol ang kapulisan sa siyudad sa Sugbo og special investigation task group (SITG) nga motutok sa imbestigasyon sa pagpusil-patay kang Atty. Joey Luis Wee niadtong Nobiyembre 23, 2020.
Si Police Colonel Josefino Ligan, direktor sa hepe sa Cebu City Police Office (CCPO), niingon nga maglangkob sa SITG mao ang Criminal Investigation and Detection Group (CIDG) 7, PNP Crime laboratory, City Intelligence Unit, Investigation and Detective Management Branch lakip na ang Mabolo Police Station.
Ang matag unit adunay tagsa-tagsa ka mga tahas nga maoy ilang tutukan ug aron mapalapdan pa ang imbestigasyon ilabi na nga wala pa silay matumbok nga suspek ug anggulo sa insidente.
“Kinahanglan nga matibuok ang trabaho, mahatagan og specific tasking each unit kay i-involve naman nato ang CIDG, ang Regional Crime Laboratory ang CIU ang IDMB ug mismo ang station so may specific tasking nana,” matod ni Ligan.
Gipasabot ni Ligan nganong mi umol silag task group tungod kay sakop sa Integrated Bar of the Philippines (IBP) ang biktima ug nasulod na sa kategoriya nga mag tukod silag special team nga mo tutok sa imbestigasyon.
Apan iyang gipasabot nga bisan pa man nga wala pa maumol ang SITG ang mga imbestigador sa kapulisan nagpadayon na kini sa ilang pagsusi sa hitabo sama sa pag back track sa kuha sa CCTV camera sa dapit diin gipusil-patay si Wee.
Ang unang nakuha nga video sa kapulisan mao pa lang kadtong lugar nga gipusil si Wee. / AYB