SUPERBALITA CEBU

Covid-19 cases sa Mandaue misaka

Miangkon ang Emergency Operations Center (EOC) sa dakbayan sa Mandaue nga adunay pagsaka sa kaso sa Covid-19 sukad niadtong Nobiyembre 16, 2020.

Gikan sa upat ka kaso ang average nga magpositibo sa Covid-19 matag adlaw, karon ang average na niini anaa na sa lima ka kaso.

Matod ni Atty. August Lizer Malate, ang pangulo sa EOC, ang maong trend nga pagsaka sa kaso sukad niadtong Nobiyembre 16 tungod sa padayong pag-testing sa mga negosyante sa ilang mga empleyado.

Ang sagad sab sa mga nagpositibo sa Covid-19 karong panahona mao ang mga trabahante sa mga frontline services sa mga establishemento.

Gani, si Malate isip pangulo sab sa Business Permit and Licensing Office sa dakbayan sa Mandaue, nakigkoordinar sab siya mga negosyante kung adunay magpositibo sa Covid-19 sa ilang buhatan.

Matod niya nga gi-require nila ang mga negosyante nga muhatag og taho nila bahin sa maong panghitabo aron mahatagan sa dakbayan og mga serbisyo sama sa pag-decontaminate, contact tracing ug uban pa.

Matod ni Malate nga bisan paman nga nisaka ang kaso sa Covid-19 sa dakbayan, padayon gihapon kining namintinar ang positivity rate nga ubos sa tres porsyento.

Gani, maayo ra gihapon kini alang sa Mandaue tungod wala kini milapas sa goal sa Department of Health (DOH) nga singko porsyento nga positivity rate.

Ang positiviy rate mao ang porsyento kung pila lang ang magpositibo ikompara sa pila ang gipaubos sa swab testing.

Niaging semana anaa pa ang aktibo nga kaso sa Covid-19 sa 80 apan gitaho niadtong Nobiyembre 26, 2020 nga niabot nasab kini og 101.

Bisan paman sa pagsaka sa mga kaso, matod ni Malate nga dili na angay pa nga mag-istrikto sa mga sumbanan sa dakbayan apan kinahanglan lang nga padayon ang mga istratehiya nga gibuhat sa dakbayan.

Sumala ni Malate nga angay lang nga padayon lang gihapon ang ilang pag-contact trace, pagpaubos sa swab testing ug treatment alang sa mga magpositibo sa Covid-19. / KFD


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph