Ang Cebu City Government mo-release sa upat ka buwan nga financial assistance sa 85,000 ka mga senior citizen sugod sa ikaduhang semana sa Disyembre, 2020.
Kini ang gipahibawo ni Mayor Edgardo Labella duha ka adlaw human niya gipahibawo ang distribution sa ayuda alang sa persons with disability (PWD) nga magsugod sa Disyembre 2.
Si Labella nagkanayon nga makobra sa mga senior citizen ang ilang ayuda balor og P4,000 nga alang sa Septiyembre hangtod sa Disyembre.
Ang mayor nitug-an nga kadtong mga senior citizen, kinsang cash card mahuman na og himo sa Land Bank of the Philippines nianang higayona, ipaagi na sa automated teller machine (ATM) ang ayuda.
Apan kadtong di pa maapil sa unang batch sa cash card sanglit di madungan tanan gumikan sa gidaghanon, ang mayor niingon nga i-distribute kini pinaagi sa house-to-house sama sa ilang gihimo dihang grabe ang pagsiaw sa coronavirus disease (Covid-19) niadtong Hulyo.
Si Labella nagkanayon nga magsilbe kining pinaskohan sa mga lolo ug lola sanglit Disyembre na sunod semana.
Ila kining magamit sa Noche Buena taliwa niining pandemya.
Ang mga PWD makadawat sa ilang P6,000 alang sa unom ka buwan nga wala nila madawat sugod Disyembre 2, Miyerkules, sunod semana hangtod sa Disyembre 15.
Ang senior citizens ug PWD sa Cebu City makadawat og tag P12,000 matag tuig gikan sa City Government. / PAC