Gisugdan ang una sa tulo ka adlaw nga Mini Suroy-Suroy sa Isla sa Bantayan kagahapon sa buntag, Biyernes, Nobiyembre 27.
Usa kini sa mga kalihukan nga nasubay sa pagbukas og balik sa turismo sa isla nga nabantog sa eco-tourism hilabi na sa mga nindot nga beach.
Ang Mini Suroy-Suroy usa ka proyekto sa Cebu Provincial Government, Mactan-Cebu International Airport Authority (MCIAA), ug Department of Tourism-Central Visayas.
Dungan sa maong kalihukan ang unang adlaw sa pagdawat og flights sa bag-o lang nahuman ug gipanindot nga Bantayan Airport nga nahimutang sa Lungsod sa Santa Fe.
Gisugdan og trabaho ang tugpahanan niadtong Hunyo 2019 ug moabot sa 1.2 kilometros ang gitas-on sa runway niini.
Gibiyahe ang mga partisipante sa Mini Suroy-Suroy gikan sa MCIA paingon sa Bantayan sakay sa chartered flights sa Leading Edge Air Services Corp. kinsang eroplano adunay 50-seating capacity.
Ang biyahe gikan sa Isla sa Mactan paingon sa Isla sa Bantayan molungtad lang og dili molapas sa 30 minutos.
Usa ka welcome ceremony ang gipahigayon pag-abot sa Bantayan Airport nga gitambonga nila Cebu Governor Gwendolyn Garcia, Presidential Spokesperson Harry Roque Jr., Presidential Assistant for the Visayas Secretary Michael Dino, MCIAA General Manager Steve Dicdican, Department of Tourism-Central Visayas Director Shahlimar Hofer Tamano, ug uban pang mga opisyales sa gobiyerno.
Gihangop ni Garcia ang makasaysayang adlaw nga gihulagway nga makatabang sa mga tawo sa Lungsod sa Santa Fe, Madridejos, ug Bantayan.
“This is truly a historic moment. When something is meant to be, the right people are put together at the right time for the right reason. This effort that will serve the people of Santa Fe, Madridejos, and Bantayan as well as so many other tourists that wish to come is the right reason and that is why we have come together in order to achieve that dream,” asoy ni Garcia.
Gikalipay ni Roque ang pagbukas og balik sa turismo sa Isla sa Bantayan ug nakita sa opisyal ang pagsunod sa mga tawo sa minimum health standards.
“Napakaganda po ng nangyayari dito sa Bantayan. Nakikita niyo naman people are observing social distancing, people are wearing masks, and people are, I think, washing hands. Ang mga Cebuano pinakita na hindi dapat maging hadlang ang Covid-19 para isulong ang kabuhayan sa sektor ng turismo,” asoy ni Roque.
Nipahimangno usab si Dino nga kanunayon ang pagsunod sa health protocol batok coronavirus disease karong naghinayhinay na og abli og balik ang turismo.
“If you follow the protocols bisag open na ang atong airport, open na ang atong tourism industry, dili ta matakdan,” asoy ni Dino.
Special guests usab sa Mini Suroy-Suroy nga ipahigayon hangtod Nobiyembre 29 ang mga kandidata sa Miss Universe Philippines 2020.
MAGTUOB
Nagbaha ang mga tawo nga nanugat ug nanambong sa mga kalihukan nga naghangop sa mga bisita.
Tungod niini, giawhag ni Madridejos Mayor Salvador Dela Fuente ang tanan nga nitambong ug misaksi sa gipahigayon nga Suroy-Suroy Sugbo sa pag tu-ob o steam inhalation.
Kini ang paagi nga mapugngan ang pagkatap sa kagaw sa coronavirus disease (Covid-19) gikan sa usa ka tawo nga posibleng asymptomatic nga mitambong sa maong kalihukan.
“Bisan tuod nag face mask ug anaa kita sa lugar nga open air ug duol pa gyud sa baybayon gi-awhag lang gihapon ang mga nanambong sa pagbuhat sa maong sugyot,” matod ni Dela Fuente pinaagi sa social media page niini.
Ang kalihukan kon diin nakita ang pag dasok sa mga tawo gipahigayon sa Kota Heritage Park sa lungsod sa Madridejos sa Nobiyembre 27 atol sa unang adlaw sa Sta. Fe, Madridejos, Bantayan (SMB) escapade. / dugang taho ni ANV