Labella uyon sa Misa de Gallo, apan may mga kondisyon

SunStar File Photo
SunStar File Photo

Uyon si Cebu City Mayor Edgardo Labella sa pagpahigayon sa Misa da Gallo sa simbahang Katoliko, apan duna siyay daghang mga kondisyon.

Kini human niya masayri ang pamahayag ni Presidential Spokesperson Harry Roque nga gitugyan sa Inter-Agency Task Force (IATF) ngadto sa mga local government unit (LGU) ang paghukom sa pagpahigayon sa mga misa alang sa kasaulogan sa Pasko.

Matod ni Labella nga kinahanglan nga unang plantsahon ang balaud sa curfew nga nasyonal ug lokal aron di makalapas sa curfew ang pagpahigayon sa mga misa nga himuon sa kaadlawon.

“Kon mao na ang position sa national government, unahon usa nato pag-reconcile ang curfew laws nga mo jive, dili mo-conflict kon ugaling man atong tugotan ang Misa de Gallo,” matod ni Labella.

Gusto ni Labella nga masayran ang mga schedule sa mga simbahan kay nasayod siyang lainlain ang mga oras sa pagpahigayon sa ilang mga misa.

“Unya ako tang gustong mahibaw-an, kay ang Misa de Gallo sa nagkalainlaing simbahan, lainlain man ang schedule. Para mahibaw-an nato unsaon sa pag-reconcile ang Misa de Gallo. Kana tingaling curfew ang atong unahon seguro,” dugang ni Labella.

Ang Cebu City adunay curfew ordinance ug executive order nga nagpatuman sa curfew gikan sa alas 11 sa gabii hangtod sa alas 5 sa buntag niining panahon sa pandemya.

Gawas niini, matod ni Labella nga kinahanglan nga ang tanang mga health protocol nga gilatid sa IATF masunod, sama sa 50 porsyento rang kapasidad sa matag simbahan.

Ang mga misa kinahanglan nga naa ra sab sa simbahan, wa sa mga kapilya ug uban pang nga dapit.

“Isunod gyud nato ang lagda sa IATF nga 50% ray makasulod ug wala nay misa gawas sa mga simbahan, sa simbahan ra gyud .Wala nay misa sa mga kapilya o bisan asa kon ang misa mahitungod sa Misa de Gallo,” dugang sa mayor.

Niini, makigtabo siya kang Cebu Archbishop Jose Palma aron mahisgutan ug maplantsa kining mao nga problema.

Human sa makuti nga mga pagtuon, mopagawas si Labella og EO alang niini.

Sa usa ka press conference sa Biyernes sa udto, Nobiyembre 27, si Labella niawhag sa mga residente sa dakbayan sa Sugbo nga di mopahigayon og mga Christmas party.

Siya nabalaka nga di masunod ang mga health protocol labina kon dunay mangahubog.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph